मिलेमतोमा संसद् विचौलियाको खेल मैदान : अध्यक्ष प्रचण्ड

काठमाडौँ । नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल प्रचण्डले बिचौलियाहरुको मिलेमतोमा संसद्लाई खेलमैदान बनाइएको बताएका छन् । उनले देश संकटमा रहेको भन्दै गम्भीर चिन्ता समेत व्यक्त गरेका छन् ।

विस्तृत शान्ति सम्झौता र संविधान निर्माणका बेला जनतासँग व्यक्त गरिएको प्रतिवद्धता आजको अवस्थासँग मेल नखानेसमेत प्रचण्डले बताए । वर्तमान सत्ताको कार्यशैलीका कारण ती सबै सपना अपमानित बनाएको समेत प्रचण्डको टिप्पणी छ ।

शान्ति सम्झौताका बेला देखिएको सपना अनुसार अघि नबढेको प्रचण्डको भनाइ छ । भ्रष्टाचार, अराजकता र बेथिति मौलाएकोमा प्रचण्डको चिन्ता थियो । प्रचण्डले वर्तमान सरकार दलाल र बिचौलियाको स्वार्थमा चलेको आरोप समेत लगाए ।

प्रतिनिधिसभामा विशेष सम्बोधन गर्दै प्रचण्डले अप्राकृतिक गठबन्धनको चरित्र लोकले नै लाज मान्ने गरी उजागर भएको प्रचण्डको दावी थियो । अर्बौँको चलखेल उल्ट्याउन र सेटिङ भत्काउन खोज्दा बनेको अप्राकृतिक गठबन्धन स्वयंले आफ्नो चरित्र प्रकट गरिसकेको छ, प्रचण्डले संसद्मा विशेष सम्बोधन गर्दै भने ।

प्रधानमन्त्री केपी ओलीले यो सरकार दुई तिहाइको सरकार हो, खरानीको डल्लो होइन हेक्का रहोस् भनेको प्रचण्डले स्मरण गरे । दलाल र बिचौलियाको पक्षमा सरकार नतमस्तक बनेको प्रचण्डले बताए । उनले प्रधानमन्त्रीको बेडरुमसम्म बिचौलियाको पहुँच रहेको छ भनेर आम जनताले थाहा पाइसकेको समेत बताए । जनभरोसा र जनविश्वास समाप्त हुँदै गएको प्रचण्डको भनाइ छ ।

सेटिङ भत्काउन खोज्दा यो गठबन्धन बनेको हो भन्ने कुरा अहिलेको सरकारको व्यवहारले नै पुष्टि गरिसकेको प्रचण्डले बताए । सुरक्षा निकायको हतियार किन्ने कुरा अहिले कसको स्वार्थमा सुरु गर्न खोजिएको हो, म प्रधानमन्त्रीको जवाफ चाहन्छु । बिचौलियाहरुबाहेक सरकारसँग को खुसी छ, उनले प्रश्न गरेका छन् ।