सल्यानमा मिनी ट्रक दुर्घटना हुँदा चार जनाको मृत्यु

सुर्खेत । सल्यानमा मिनी ट्रक दुर्घटना हुँदा चार जनाको मृत्यु भएको छ । सोमबार भएको उक्त दुर्घटनामा परेर मृत्यु हुनेको संख्या चार जना पुगेको प्रहरीले जनाएको छ ।

सोमबार अपराह्न कपुरकोट गाउँपालिका–६, सिनबाङको दुबेदेबाट धान र पराल बोकेर छाप्नेटातर्फ जाँदै गरेको रा १ ख २४०२ नम्बरको मिनी ट्र«क दुर्घटना भएको थियो ।

उक्त मिनी ट्रक सडकबाट अन्दाजी १५० मिटर तल खसेर दुर्घटना हुँदा चालक २४ वर्षीय मानबहादुर भण्डारी, १४ वर्षीय गोवर्द्धन खड्का, १२ वर्षीय डिल्ली भण्डारी र १३ वर्षीय सृजना बस्नेतको मृत्यु भएको हो ।

तीमध्ये चालक भण्डारीको दाङको तुल्सीपुर राप्ति अस्पतालमा उपचारको क्रममा राती मृत्यु भएको हो भने अन्यको बाटोमै मृत्यु भएको थियो ।

यस्तै, सोही दुर्घटनामा परेर ७ जना घाइते भएका छन् । उनीहरुको विभिन्न अस्पतालमा उपचार भइरहेको जनाइएको छ ।