१७ दिनदेखि बेपत्ता मेजर पण्डित मृत अवस्थामा फेला
तु खबर संवाददाता२०८० भाद्र २६,मंगलवार १८:३६
सुर्खेत । १७ दिनदेखि बेपत्ता भएका डोल्पाको नन्द बक्स ब्यारेकका मेजर विमल पण्डित मृत अवस्थामा फेला परेका छन् ।
पण्डित मंगलबार भेरी नदी अन्तर्गत त्रिपुरासुन्दरी नगरपालिका–५ खदांगको चिन्ढेबगरमा मृत अवस्थामा फेला परेका हुन् ।
स्थानीयले मंगलबार बिहान नदी किनारमा शव भेटिएपछि प्रहरीलाई खबर गरेका थिए । स्थानीयको खबरपछि घटनास्थल पुगेका प्रहरीले शवको पहिचान गर्न सकेन ।
यद्यपी प्रहरीसँगै पुगेका सेनाका दुई जना मेजरले घडी र औँठीका आधारमा उक्त शव पण्डितकै रहेको पुष्टि गरेको प्रहरीले जनाएको छ । मेजर पण्डिका बुबा पनि डोल्पा पुगेका छन् ।
शवलाई जिल्ला अस्पताल ल्याउने तयारी भइरहेको जनाइएको छ ।
काठमाडौंको कागेश्वरी डाँछीका ३८ वर्षीय पण्डित गत भदौं १० मा त्रिपुराकोटबाट बेपत्ता भएका थिए ।
