पहिरोको ढुंगाले लागेर मकवानपुरमा कार्यरत प्रहरी जवानको मृत्यु

मकवानपुर । मकवानपुरमा कार्यरत प्रहरी जवान कृतिबहादुर नेपालीको शुक्रबार मृत्यु भएको छ । नेपालीको सुख्खा पहिरोमा खसेको ढुङ्गाले लागेर मृत्यु भएको जिल्ला प्रहरी कार्यालय मकवानपुरका प्रहरी उपरीक्षक (एसपी) सीताराम रिजालले जानकारी दिए ।

प्रहरी उपरीक्षक रिजालका अनुसार, मृतक नेपाली जाजरकोट जिल्लाको शिवालय नगरपालिका वडा नम्बर ८ स्थाई घर भई हाल भीमफेदी गाउँपालिका वडा नम्वर २ स्थित प्रहरी चौकी भैंसेमा कार्यरत थिए ।

२२ वर्षीय नेपाली बिहीबार भैंसेस्थित प्रहरी पोष्टमा डिउटीको समयमा चिप्लिएर लडी घाईते भएका थिए । हेटौंडा अस्पतालमा उपचार पश्चात फर्किने क्रममा भैंसेस्थित सुख्खा पहिरोमा खसेको ढुंगाले लागेर नेपाली पुनः घाइते भएको र उनको हेटौंडा अस्पतालमा उपचारको क्रममा १२ः३० बजेको समयमा मृत्यु भएको प्रहरी उपरीक्षक रिजालले बताए ।

मृतक नेपालीसँगै पहिरोको ढुङ्गा लागेर प्रहरी जवान सुनिल मेचे घाइते भएका छन् । उनको हेटौंडा अस्पतालमा उपचार भइरहेको र अवस्था समान्य रहेका जनाइएको छ ।