बागमती प्रदेश : मन्त्री बन्नेमा अधिकाँश तत्कालिन माधव समूहका

मकवानपुर । बागमती प्रदेशकी मुख्यमन्त्री अष्टलक्ष्मी शाक्यले आज (बुधबार) मन्त्रिपरिषद् विस्तार गर्दै छिन् ।

५ जना मन्त्री र ४ जना राज्यमन्त्री नियुक्त गर्न लागिएको स्रोतले बताएको छ । शाक्यले अधिकाँश तत्कालिन माधव पक्ष निकट सांसदहरुलाई मन्त्री नियुक्त गर्न लागेको स्रोत बताउँछ ।

सांसदहरु प्रदिप कटुवाल, शान्ति पौडेल, रचना खड्का र विजय सुवेदी मन्त्री बन्ने चर्चामा छन् । त्यस्तै जुनेलीमाया श्रेष्ठलाई राज्यमन्त्री नियुक्त गर्ने तयारी गरिएको छ ।
शाक्य गत भदौ २ गते मुख्यमन्त्री पदमा नियुक्त भएकी थिइन् । उनले सोही दिन केशवराज पाण्डेलाई आन्तरिक मामिला तथा कानून मन्त्रालय र भौतिक पूर्वाधार विकास मन्त्री र कृष्णप्रसाद शर्मा खनाललाई सामाजिक विकास मन्त्री नियुक्त गरेकी थिइन् ।

तर, सामाजिक विकासमन्त्री खनालले भने केही दिन अघि पदबाट राजीनामा दिएका छन् ।

एमाले परित्याग गरी बागमती प्रदेशका १३ जना सांसद माधव नेपालले आफ्नो नेतृत्वमा गठन गरेको नेकपा एकीकृत समाजवादीमा गएसंगै शाक्य अल्पमतमा परेकी छिन् ।
नेकपा एमालेको स्पष्ट बहुमत अर्थात ५६ सांसदमध्ये मतमध्ये अब एमालेमा ४३ मात्रै बाँकी छन् ।