कतारबाट १४९ नेपाली स्वदेश फर्किए

कतारको दोहाबाट शुक्रवार १४९ नेपाली स्वदेश फर्केका छन् । दोहाबाट भएको तेह्रौ उडान मार्फत ७ जना महिलासहित १ सय ४२ पुरुष स्वदेश फर्केका हुन् ।

नेपाली राजदूतावास दोहा कतारले दिएको जानकारी अनुसार दीर्घ रोगी, स्वास्थ्यमा समस्या भएका, रोजगारी गुमाएका र महिलाहरुलाई प्राथमिकताको आधारमा स्वदेश लगिएको हो ।

कतारको दोहा स्थित हमाद अन्र्तराष्ट्रिय विमान स्थलबाट नेपाल वायु सेवा निगमको आरए २३९२ को उडानबाट प्राथमिकतामा परेका र स्वदेश फर्कनै पर्ने नेपालीहरुलाई स्वदेश लगिएको थियो ।

कोविड–१९ को समयमा मृत्यु भएका दुई जना नेपालीको शव पनि सोही उडान मार्फत नेपाल पठाइएको दूतावासले जानकारी दिएको छ । कतारमा कोभिड–१९ पश्चात दुई हजार ३ सय ८६ जना स्वदेश फर्किसकेका छन् भने यहाँबाट ३८ जना नेपालीको शव लगिएको थियो ।

स्वदेश फर्कने नेपालीहरुलाई हमाद अन्तर्राष्ट्रिय विमानस्थलमा विदाइ गर्नका लागि दूतावासका प्रतिनिधिहरु पुगेका थिए ।

तस्विर : नेपाली राजदूतावास दोहा कतार