सभामुख चयनका लागि आज मनोनयन दर्ता हुने

प्रतिनिधिसभाको नयाँ सभामुख चयनका लागि आज मनोनयन दर्ता हुँदैछ । सभामुख चयनको लागि आज बिहान ११ बजेदेखि दिउँसो २ बजेसम्म मनोनयन दर्ता गर्ने कार्यतालिका रहेको छ ।

प्रतिनिधिसभाका जेष्ठ सदस्य महन्थ ठाकुरले सोमबार बैठकको अध्यक्षता गर्दै सभामुखको चुनाव १२ गते गर्ने गरी निर्वाचन कार्यतालिका सार्वजनिक गर्न निर्देशन दिए ।

सोही अनुरुप संसद सचिवालयले सार्वजनिक गरेको निर्वाचन कार्यतालिका अनुसार आज बिहान ११ बजेदेखि दिउँसो २ बजेसम्म मनोनयन दर्ताको कार्यतालिका रहेको हो ।

यसैगरी आज दिउँसो साढे दुई बजे उम्मेदवारको सूची सार्वजनिक गरिनेछ ।

नेकपाले सभामुखमा स्थायी समिति सदस्य अग्निप्रसाद सापकोटालाई उम्मेद्वार बनाउने निर्णय गरेको छ। विपक्षी कांग्रेसले भने अहिलेसम्म उमेद्वारी दिन नदिने निर्णय गरेको छैन।