कैलाशको आन्तिमा पहिलो पटक पुग्यो बिजुली

मकवानपुर । मकवानपुरको कैलाश गाउँपालिका वडा नम्वर ८ स्थित भार्ताको आन्तिमा पहिलो पटक बिजुली पुगेको छ । बिजुली बत्ती झलमल्ल बलेपछि गाउँमा खुशियाली छाएको छ । बिजुली पुगेपछि यहाँका ७५ घर लाभान्वित भएका छन् ।

बिहीबार गाउँपालिका अध्यक्ष लोकबहादुर मुक्तानले ट्रान्सफर्मरमा जडान गरिएको बत्ती बालेर बिजुली उद्घाटन गरेका थिए । उनले आफ्नो कार्यकाल अवधिमै कैलाशका सबै वडामा बिजुली बत्ती पुर्याउने प्रतिबद्धता जनाए ।

‘बर्षा, रातदिन केही नभनी वितरणको कामलाई हाम्रो टिमले निरन्तरता दियो । यसैको परिणाम हो ढिलैभएपनि आज गाउँमा उज्यालो छाएको छ ।’ उनले भने – ‘हामी यो कार्यलाई निरन्तरता दिँदै कैलाशलाई हाम्रै पालामा उज्यालो गाउँपालिका बनाउनेछौं ।’

कैलाश गाउँपालिकाका वडा नम्वर ३, ४, ७ र ८ का करिब ७० प्रतिशत घरमा अझै पनि बिजुली पुगेको छैन । नेपाल विद्युत प्राधिकरणसँगको सहकार्यमा बत्ती नबलेका घरमा बिजुली पु¥याउन पालिकाले निरन्तर काम गर्ने अध्यक्ष मुक्तानले बताए ।

गाउँपालिका उपाध्यक्ष बालकुमार मल्लले जनताको आवश्यकतालाई प्राथमिकतामा राखेर विकासका कामलाई तिव्रता दिइने बताए । टुकीको भरमा जीवन निर्वाह गरिरहेका यहाँका स्थानीयका लागि बिजुली आएपछि धेरै राहत मिल्ने उनको भनाई छ । उद्घाटन कार्यक्रममा ८ नम्वर वडाध्यक्ष आशिष प्रजा, पुर्ववडाध्यक्ष सुर्यबहादुर थिङ, वडा सदस्य विपिराज थिङलगायतका उपस्थित थिए ।