नेपाल हुँदै भारत प्रवेश गरेका आतंककारीबारे बिहारमा हाई अलर्ट

काठमाडौं । पाकिस्तानस्थित आतंकवादी संगठन जैश–ए–मोहम्मदका तीन जना आतंककारी नेपाल हुँदै भारतको बिहार प्रवेश गरेको भारतले दाबी गरेको छ।

भारतीय प्रहरी मुख्यालयले तीनै आतंककारीको नाम, तस्बिर र राहदानी विवरण सार्वजनिक गर्दै भागलपुरलगायत बिहारका सबै जिल्लामा सुरक्षा सतर्कता (हाई अलर्ट) जारी गरेको छ। उनीहरू क्रमशः बहावलपुरका मोहम्मद उस्मान, उमरकोटका आदिल हुसेन र रावलपिंडीका हसनैन अली अवान भएको भारतीय सञ्चारमाध्यमले जनाएका छन्।

भारतीय मिडियाका अनुसार ती आतंककारीहरू अगस्ट दोस्रो साता काठमाडौं पुगेका थिए र त्यसपछि बिहारतर्फ प्रवेश गरेका हुन्। यसबारे प्राप्त सूचनाले भारतीय सुरक्षा निकायमा हलचल पैदा गरेको छ।

भारतले विशेषगरी नेपालसँग सीमा जोडिएका सितामढी, मधुबनी, पश्चिम चम्पारण, अररिया, किशनगञ्ज र सुपौल जिल्लाका प्रहरीलाई उच्च सतर्क रहन निर्देशन दिएको छ। साथै स्थानीयलाई कुनै गतिविधि शंकास्पद देखिए तत्काल नजिकैको प्रहरीलाई खबर गर्न आग्रह गरिएको छ।

गुप्तचर निकाय परिचालनसँगै बिहारमा व्यापक निगरानी सुरु गरिएको भारतीय सञ्चारमाध्यमले उल्लेख गरेका छन्। भारतले यी तीन पाकिस्तानी नागरिकले आतंकी गतिविधि गराउन सक्ने भन्दै त्रास व्यक्त गरेको छ।