डडेल्धुरामा जिप दुर्घटना : चार जनाको मृत्यु, चार घाइते

डडेल्धुराको नवदुर्गा गाउँपालिका–५ चौडामा बिहीबार बिहान जिप दुर्घटना हुँदा चार जनाको ज्यान गएको छ भने चार जना घाइते भएका छन्।

उग्रतारा यातायातको से १ ज ७३८ नम्बरको जिप दुर्घटनामा परी घटनास्थलमै नवदुर्गा–५ का १८ वर्षीय सुरेश साउद, २३ वर्षीय सुरेश पार्की, ४० वर्षीया तारा अवस्थी र ७२ वर्षीया कलावती साउदको मृत्यु भएको जिल्ला प्रहरी कार्यालय डडेल्धुराले जनाएको छ।

दुर्घटनामा १८ वर्षीया सुशिला बिक, चार वर्षीया प्रतिका पार्की, ४८ वर्षीय चन्द्रबहादुर साउद र ३५ वर्षीय जीप चालक रामबहादुर साउद घाइते भएका छन्। घाइतेमध्ये सुशिला बिक र चालक रामबहादुरको अवस्था गम्भीर रहेको प्रहरीले जनाएको छ। उनीहरूलाई उपचारका लागि डडेल्धुरा अस्पतालमा भर्ना गरिएको छ।