शेयर बजारमा रौनकः अब लयमा फर्किएको हो ?

काठमाडौँ । शेयर बजारमा लगातार सुधारको क्रम जारी रहँदै बुधबार नेप्से परिसूचक उच्च अंकले उकालो लागेको छ।

गत दुई दिनयता देखिएको सकारात्मक प्रवृत्तिलाई निरन्तरता दिँदै आज पनि बजारमा उत्साहजनक कारोबार भएको हो। विश्लेषकहरूले ब्याजदरमा आएको निरन्तर कमी, नेपाल राष्ट्र बैंकका नीतिगत सुधार तथा नियामक निकायहरूको सक्रियताले बजारलाई बल पुर्‍याएको जनाएका छन्।

बैंक तथा वित्तीय संस्थाले २०८१/८२ को वित्तीय विवरण सार्वजनिक गर्दा अधिकांश कम्पनीको नाफा वृद्धि भएको छ। लाभांश वितरण क्षमतामा देखिएको सुधारले लगानीकर्ताको आत्मविश्वास थप बढाएको छ।

नेपाल स्टक एक्सचेञ्ज (नेप्से) आज ५६.६९ अंकले बढेर २८२२.७८ विन्दुमा पुगेको छ। ३२१ कम्पनीका १ करोड ४९ लाख ८६ हजार कित्ता शेयर किनबेच हुँदा ७ अर्ब ६८ करोड ३३ लाख रुपैयाँभन्दा बढीको कारोबार भएको हो।

उपसमूहगत हिसाबमा सबै १३ सूचक हरियाली देखिएका छन्। विकास बैंक समूहको शेयर मूल्य सर्वाधिक ३.५९ प्रतिशतले बढ्दा, फाइनान्स २.१५ प्रतिशत, जीवन बीमा २.३९ प्रतिशत, इन्भेष्टमेन्ट २.३८ प्रतिशत तथा वाणिज्य बैंक समूहको मूल्य १.५१ प्रतिशतले बढेको छ।

आज २३२ कम्पनीको शेयर मूल्य बढेको छ भने १९ कम्पनीको घटेको छ। यसले बजारमा सुधारको लहर अझै जारी रहने अपेक्षा थप बलियो बनाएको छ।