शिक्षक महासंघको आन्दोलन : कांग्रेसकेन्द्रीय कार्यालयमा धर्ना
तु खबर संवाददाता
काठमाडौं । विद्यालय शिक्षा विधेयकप्रति असन्तुष्टि जनाउँदै आन्दोलनरत नेपाल शिक्षक महासंघले बुधबार नेपाली कांग्रेसको केन्द्रीय कार्यालय सानेपामा धर्ना दिएको छ ।
आन्दोलनको पहिलो चरणअन्तर्गत बिहान ११ बजेदेखि दिउँसो १ बजेसम्म महासंघले सानेपास्थित कांग्रेस कार्यालय अगाडि धर्ना बसेर ध्यानाकर्षण पत्र बुझाएको हो ।
महासंघले यसअघि २०७५, २०७८, २०८० र २०८१–८२ सालमा सरकारसँग भएका सहमति कार्यान्वयन गर्नुपर्ने माग राख्दै आएको छ । प्रतिनिधिसभा र राष्ट्रियसभाबाट विगतमा भएको सहमति अनुसार विधेयक सच्याउनुपर्ने महासंघको माग छ ।
महासंघका अध्यक्ष लक्ष्मीकिशोर सुवेदीका अनुसार बिहीबार नेकपा (एमाले) को केन्द्रीय कार्यालय च्यासल र शुक्रबार नेकपा (माओवादी केन्द्र) को केन्द्रीय कार्यालय पेरिसडाँडामा धर्ना दिने कार्यक्रम तय भएको छ ।
भदौ ९ गतेदेखि आन्दोलनमा रहेको शिक्षक महासंघले प्रमुख राजनीतिक दलका सचेतकलाई ध्यानाकर्षण पत्र बुझाउनेदेखि पार्टी कार्यालयमा धर्नासम्मका कार्यक्रम अघि बढाएको छ ।
हाल विद्यालय शिक्षा विधेयक प्रतिनिधिसभाबाट पारित भई प्रतिवेदनसहित राष्ट्रिय सभामा पेस हुने प्रक्रियामा रहेको छ । त्यहाँ पारित भई राष्ट्रपतिसमक्ष पुगेपछि विधेयक ऐनको रूपमा कार्यान्वयनमा आउनेछ ।
