नागरिक उन्मुक्ति पार्टी पुनः सत्ता पक्षमा समर्थन कायमै रहेको घोषणा

काठमाडौँ — नागरिक उन्मुक्ति पार्टीले प्रधानमन्त्री केपी शर्मा ओली नेतृत्वको सरकारलाई दिएको समर्थन कायमै रहेको स्पष्ट पारेको छ ।

पार्टीकी अध्यक्ष एवम् संसदीय दलकी नेता रञ्जिता श्रेष्ठ चौधरीले बुधबार सभामुख देवराज घिमिरेलाई पत्र लेख्दै सरकारप्रति पूर्णकालीन विश्वास एवम् समर्थन रहेको जानकारी दिएकी हुन् । सो पत्रमार्फत उनले ४६ दिनपछि पुनः सत्ता पक्षकै बेन्चमा फर्कने निर्णयसमेत सार्वजनिक गरेकी छिन् ।नागरिक उन्मुक्ति पार्टीको निर्णयबमोजिम २०८२ असार २२ मा समर्थन फिर्ता लिएको पत्र बदर गरी वर्तमान सरकारलाई समर्थन कायम रहेको जानकारी गराउँदै अब सरकार पक्षतर्फ रहने अनुरोध गरिएको छ।

सुदूरपश्चिमका मुख्यमन्त्री कमलबहादुर शाहले मन्त्री रामेश्वर चौधरीलाई पदमुक्त गरेपछि असार २० गते पार्टीले संघ र प्रदेश दुवै सरकारबाट समर्थन फिर्ता लिएको थियो ।

यसैबीच, पार्टीले पूर्वसंसदीय दलका नेता गंगाराम चौधरीलाई पदमुक्त गर्दै अध्यक्ष रञ्जिता श्रेष्ठलाई दलको नेताको जिम्मेवारी दिने निर्णय गरेको छ । गंगाराम चौधरीलाई पार्टी हित विपरीत कार्य गरेको आरोपमा साउन ३० गते कारबाही गरिएको जानकारी पत्रमार्फत सभामुखलाई दिइएको छ ।

नागरिक उन्मुक्ति पार्टी भित्र आन्तरिक विवाद अझै समाधान भइसकेको छैन । पोखराको ‘लिचिबारी काण्डमा अध्यक्ष श्रेष्ठको नाम जोडिएपछि संरक्षक रेशम चौधरीले असन्तुष्टि जनाउँदै बहुमत सदस्यको उपस्थितिमा रञ्जितालाई अध्यक्षबाट हटाउने निर्णय गरेका थिए । तर निर्वाचन आयोगले लालवीर चौधरीलाई मान्यता नदिई श्रेष्ठलाई नै वैधानिक अध्यक्षका रूपमा कायम राखेपछि विवाद झन् चर्किएको हो ।