शेयर बजारमा सामान्य सुधार, लगानीकर्ताको मनोबल कमजोर

काठमाडौं । साता कारोबारको तेस्रो दिन मंगलबार शेयर बजारमा सामान्य सुधार देखिएको छ । विगतका केही दिनदेखि लगातार घट्दै आएको बजार आज ९.७६ अंकले बढेर नेप्से परिसूचक २७८० को बिन्दुमा पुगेको हो ।

आज ३१६ कम्पनीको १ करोड ३१ लाख २४ हजार कित्ता शेयर किनबेच हुँदा कुल कारोबार रकम पाँच अर्ब ६३ करोड ६५ लाख रुपैयाँ पुगेको छ ।

क्षेत्रगत इन्डेक्स हेर्दा होटल्स तथा टुरिज्मबाहेकका सबै उप–सूचकमा सुधार भएको देखिएको छ । बैंकिङ इन्डेक्स ०.५७ प्रतिशत, लाइफ इन्स्योरेन्स ०.२७ प्रतिशत, र म्यानुफ्याक्चरिङ इन्डेक्स ०.५२ प्रतिशतले वृद्धि भएको छ । मंगलबार कारोबार भएका कम्पनीमध्ये १४२ वटाको शेयरमूल्य बढेको छ ।

यद्यपि बैंक तथा वित्तीय संस्थाले लाभांश क्षमता बलियो देखाउने विवरण सार्वजनिक गरिसके पनि त्यसले बजारमा ठोस प्रभाव पार्न सकेको छैन । विश्लेषकहरूका अनुसार बजारमा माफियाको प्रभाव र उच्च मूल्यमा खरिद गर्ने प्रवृत्तिले अस्थिरता बढाएको छ । मौद्रिक नीतिले केही समय बजारमा सकारात्मक सन्देश दिएको भए पनि पछिल्ला हप्तामा निरन्तर गिरावटसँगै लगानीकर्ताको मनोबल अझै कमजोर देखिएको छ ।