लगातारको गिरावटले लगानीकर्ताको मनोबल कमजोर, नेप्से २७८५.७४ बिन्दुमा

काठमाडौँ । पुँजी बजारमा लगातारको गिरावट आज पनि रोकिएको छैन । पछिल्ला केही दिनदेखि जारी घटबढको लहरले लगानीकर्ताको करोडौँ रुपैयाँ जोखिममा परेको छ । केही समयअघि ३,००० बिन्दु नाघेको बजारले ३,२०० पाउने आशा जगाएको थियो, तर हाल शेयर मूल्य घट्दै जाँदा लगानीकर्तालाई ठूलो घाटा व्यहोर्नु परेको छ।

विश्लेषकका अनुसार माफियाको प्रभाव र उच्च मूल्यमा खरिद गर्ने प्रवृत्तिले बजारमा अस्थिरता बढाएको छ । मौद्रिक नीतिले केही समयका लागि सकारात्मक संकेत दिए पनि पछिल्ला हप्तामा सूचक लगातार घट्दा लगानीकर्ताको मनोबल कमजोर भएको छ । उनीहरू भन्छन्, बजारले छोटो समयमै स्थिरता पाउने सम्भावना कम छ र सुधारका लागि अझै समय लाग्नेछ ।

यसबीच, चालु आर्थिक वर्षको बैंक तथा वित्तीय संस्थाहरुको वार्षिक वित्तीय विवरण सार्वजनिक भइरहेको छ। अधिकांश संस्थाले सकारात्मक वित्तीय स्वास्थ्य र लाभांश वितरण क्षमतामा सुधार देखाए पनि यसले बजारमा तत्काल सकारात्मक प्रभाव पार्न सकेको छैन।

नेपाल स्टक एक्सचेञ्ज (नेप्से) आज १०.५० अंकले घटेर २७८५.७४ बिन्दुमा पुगेको छ । ३२१ कम्पनीका १ करोड ५८ लाख ४७ हजार कित्ता शेयर किनबेच हुँदा ६ अर्ब १६ करोड १८ लाख रुपैयाँको कारोबार भएको छ।