मुख्यमन्त्री लामाद्वारा नियुक्त तीन मन्त्रीको सपथ आज

हेटौंडा । बागमती प्रदेशमा मुख्यमन्त्री बहादुर सिंह लामाद्वारा नियुक्त तीन जना मन्त्रीहरुको सपथ आज हुने भएको छ । संसदीय दलको नेतामा इन्द्रबहादुर बानियाँसँग पराजीत भएपनि मुख्यमन्त्री छोड्न नपर्ने तर्क गर्दै बहादुर सिंह लामाले तीन जनालाई मन्त्री नियुक्त गरेका छन् ।

मुख्यमन्त्री लामाले बुधबार गोबिन्द लम्साललाई आन्तरिक मामिला तथा कानून मन्त्री नियुक्त गरेका छन् । त्यस्तै गीता गुरुङलाई सहकारी तथा गरिबी निवारण मन्त्रालय र माया श्रेष्ठलाई युवा तथा खेलकुद मन्त्रालयको जिम्मेवारी दिइएको छ ।

बागमती प्रदेश प्रमुखको कार्यालयका प्रवक्ता देवेन्द्र सापकोटाले सूचना निकालेर आज बिहीबारका लागि सपथग्रहण गराइने जानकारी दिएका छन् ।

संसदीय दलको निर्वाचनमा मुख्यमन्त्री लामा इन्द्रबहादुर बानियाँसँग २२ मतले पराजित भएका थिए । लामाको विरुद्ध २१ जना प्रदेशसभा सदस्यहरुले दलको नेता बहादुर सिंह लामाविरुद्ध अविश्वासको प्रस्ताव दर्ता गराएका थिए । सो प्रस्तावका सन्दर्भमा निर्वाचन हुँदा लामाले बानियाँसँग पराजीत हुनु परेको थियो । लामाका मन्त्रिपरिषद्का चार जना मन्त्रीहरुले अविश्वास प्रस्ताव दर्ता गर्नुअघि मन्त्री पदबाट राजीनामा दिएका थिए भने एक जनाले मतदान अघि राजीनामा बुझाएका थिए ।

यस अघि चालु आर्थिक वर्षको बजेटमा पनि लफडा भएपछि बजेट पास हुन सकेको थिएन । वर्तमान दलका नेता तथा काँग्रेस बागमती सभापति बानियाँको पहलमा बजेट पास भएको थियो ।

मुख्यमन्त्रीबाट राजीनामा नदिने अडानमा रहेका बहादुर सिंह लामाले आज मन्त्री परिषद् विस्तार गर्न लागेका हुन् ।