रास्वपाद्वारा गृहमन्त्रीको राजीनामा माग, अनियमितता प्रमाणित भए राजनीतिबाटै राजीनामा : लेखक

राष्ट्रिय स्वतन्त्र पार्टीले गृहमन्त्री रमेश लेखकको राजीनामा माग गरेको छ ।

आज शनिबार भएको सो पार्टीको केन्द्रीय समिति बैठकले त्रिभुवन विमानस्थल अध्यागमन कार्यालय प्रमुख सहसचिवलाई अख्तियार दुरुपयोग अनुसन्धान आयोगले अघि बढाएको अनुसन्धान प्रकृया र भिजिट भिजामा सार्वजनिक विषयका सन्दर्भमा राजीनामा दिएर अनुसन्धानलाई सहयोग गर्न रास्वपाको माग छ ।

यथाशीघ्र गृहमन्त्रीको पदबाट राजीनामा दिएर निश्पक्ष अनुसन्धानलाई सघाउन माग गर्छौँ, सो पार्टीले जारी गरेको विज्ञप्तीमा उल्लेख छ ।

यसैबीच, गृहमन्त्री रमेश लेखकले आफ्नो राजनीतिक जीवनमा एउटामात्रै आर्थिक अनियमितता प्रमाणित भए पदबाट मात्रै नभई राजनीतिबाटै राजीनामा दिने बताएका छन् । लेखकले त्रिभुवन अन्तर्राष्ट्रिय विमानस्थलको अध्यागमन कार्यालयसँग जोडिएको घटनामा आफूविरुद्ध नियोजित र षड्यन्त्रपूर्वक प्रचारवाजी भइरहेको बताए ।

लेखकले त्रिभुवन विमानस्थल अध्यागमनको विषयमा मात्र नभई अन्य कुनै पनि आर्थिक अनियमितता प्रमाणित भए पदबाट मात्र नभई राजनीतिबाटै राजीनामा दिन तयार छु, उनले भनेका छन् ।

त्यसैगरी, गृह मन्त्रालयले एक विज्ञप्ती निकालेर सो सन्दर्भमा आफ्नो मन्त्रालयको नेतृत्वलाई नमुछ्न आग्रह गरेको छ । अख्तियार दुरुपयोग अनुसन्धान आयोगले अघि बढाएको अनुसन्धानमा सहयोग रहने पनि मन्त्रालयले स्पष्टि पारेको छ ।