बस दुर्घटना हुँदा २ जनाको मृत्यु

सुर्खेत । सुर्खेतको वीरेन्द्रनगरमा आज दिउँसो मिनी बस दुर्घटना हुँदा २ जनाको मृत्यु भएको छ ।

दिउँसो वीरेन्द्रनगर–७ कटकुवा नजिकै कर्णाली प्रदेश ०२–००१ ख ०८५२ नम्बरको मिनी बस दुर्घटना हुँदा दुई जनाको मृत्यु भएको हो ।

मृत्यु हुनेहरुमा ठाकुरबाबा नगरपालिका–६ बर्दियाका ७० वर्षीय शेरबहादुर खड्का र दैलेखको डुङ्गेश्वर गाउँपालिका–६ का भीमसेन राना रहेको जिल्ला प्रहरी कार्यालय सुर्खेतले जनाएको छ ।

प्रहरीका अनुसार, दैलेखबाट सुर्खेत आउँदै गरेको उक्त बस दुर्घटना हुँदा दुबै जनाको घटनास्थलमै मृत्यु भएको हो ।

सो दुर्घटनामा परेर बसमा सवार २१ जना घाइते भएका छन् । घाइतेहरूको कर्णाली प्रदेश अस्पताल र कर्णाली केयर अस्पतालमा उपचार भइरहेको जनाइएको छ ।