पहिरोका कारण अवरुद्ध भैंसे–भीमफेदी सडकखण्डमा यातायात सुचारु

मकवानपुर । पहिरोको कारण अवरुद्ध हेटौंडाबाट काठमाडौं जोड्ने छोटो मार्ग अन्तरगत पर्ने भैसे–भीमफेदी सडकखण्डमा यातायात सुचारु भएको छ ।

गएराति वर्षासँगै माथिबाट खसेको पहिरोका कारण अवरुद्ध उक्त सडकखण्डमा आज बिहानदेखि यातयात संचालनमा आएको मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

प्रहरी नायव उपरीक्षक कार्कीका अनुसार, गएराति साढे ११ बजेको समयमा भीमफेदी गाउँपालिका वडा नम्वर २ ज्यालटारस्थित पहिरो खसी यातायात अवरुद्ध बनेको थियो ।

लगातार वर्षाका कारण राति पहिरो हटाउन कठिनाइ भएपछि आज बिहानै पहिरो हटाई यातायात संचालनमा ल्याएको प्रहरी नायव उपरीक्षक कार्कीले बताए ।