प्रतिनिधि सभाको बैठक भोलिसम्मका लागि स्थगित
तु खबर संवाददाता२०८० असार २०, बुधबार १८:४६
काठमाडौं । प्रतिनिधि सभाको बैठक बिहीबार दिउँसो २ बजेसम्मका लागि स्थगित गरिएको छ । नेकपा एमालेको अवरोधका कारण आधा घण्टाका लागि स्थगित गरिएको बैठक दलहरुबीच सहमति हुन नसक्दा भोलिसम्मका लागि स्थगित गरिएको हो ।
प्रधानमन्त्री पुष्पकमल दाहाल (प्रचण्ड) ले आफूलाई प्रधानमन्त्री बनाउन भारतीय नागरिक प्रितम सिंह पटक–पटक दिल्ली गएको भनि दिएको अभिव्यक्तिलाई लिएर एमालेले संसद अवरोध गरेको थियो ।
एमालेको अवरोधपछि सभामुख देवराज घिमिरेले आधा घण्टाका लागि बैठक स्थगित गरेका थिए । तर पुनः बैठक सञ्चालन गर्ने विषयमा दलहरुबीच सहमति नजुटेपछि बिहीबारसम्मका लागि स्थगित गरिएको हो ।
संसद सचिवालयका एक अधिकारीका अनुसार, बैठक स्थगितको सूचना जारी गर्ने तयारी भइरहेको छ ।