हेटौंडामा एयरपोर्टः के भन्छन् उम्मेदवारहरु ?

हेटौंडा । बागमती प्रदेशको राजधानी र देशकै सामरिक महत्वको शहर बनिसकेको हेटौंडामा आन्तरिक विमानस्थल बन्न सकेको छैन । फास्टट्रयाकको नजिकको शहर, विशाल व्यापारिक केन्द्र चितवन र वीरगंजलाई समेत जोड्ने प्रमुख व्यापारिक केन्द्रको रुपमा रहेको हेटौंडामा अहिलेसम्म आन्तरिक विमानस्थल नहुँदा आपतकालिन उद्धार तथा राजधानी र अन्य शहरसँगको कनेक्टीभिटीमा समस्या भइरहेको छ ।

जहाजमार्फत् राजधानी काठमाडौं वा देशको अन्य शहरहरुमा जानु पर्दा ३९ किमीको दुरीमा रहेको बाराको सिमरा वा ७२ किमीको दुरीमा रहेको भरतपुर पुग्नुपर्ने बाध्यता छ । अथवा चार घण्टाको दुरी सडक यात्रामार्फत् काठमाडौं नै पुग्नुपर्ने अवस्था विद्यमान छ ।

विमानस्थलको अभावमा महंगो शुल्क तिरेर हेलिकोप्टर चार्टर्ड गर्नु मकवानपुरबासीको नियती बनिरहेको छ । दुर्घटना वा अन्य कारणबाट सिकिस्त बिरामीहरुको उद्धार गर्नुपर्दा लाखौं रुपैयाँ हेलिकोप्टरलाई तिर्नुपर्ने बाध्यता छ ।

हेटौंडाबाट संघीय राजधानी जोड्ने छोटो दुरीको मार्ग भीमफेदी–कुलेखानी सडकखण्डको स्तरोन्नती भइसकेको छैन । साँधुरो र कच्ची सडकका कारण दिनप्रतिदिन दुर्घटना बढिरहेको छ । ७६ किलोमिटरको सडक पार गर्न ज्यान जोखिममा पारेर घण्टौंको यात्रा गर्नुपर्ने बाध्यता छ ।

त्यस्तै हेटौंडाबाट ९१ किलोमिटर पार गरेपछि काठमाडौँ पुगिन्छ । तर, कान्तिलोकपथको हालत पनि उस्तै छ । आकस्मिक संघीय राजधानी काठमाडौँ वा देशका अन्य सहरहरुमा जानुपर्दा हेटौंडावासीले निकै सास्ती खेप्दै आएको भएपनि विमानस्थल निर्माणको विषयले प्राथमिकता पाउन सकिरहेको छैन ।

आगामी मंसिर ४ गते प्रतिनिधिसभा र प्रदेशसभा सदस्य पदको निर्वाचन हुँदैछ । मकवानपुरमा विभिन्न राजनीतिक दलको तर्फबाट वा स्वतन्त्र रुपमा उम्मेदवारी दर्ता गराएका उम्मेदवारहरुले चुनावी एजेण्डा क्रमश सार्वजनिक गरिरहेका छन् । भने केहीले गर्न बाँकी रहेको छ । हेटौंडामा विमानस्थल बनाउने विषयमा उनीहरुको धारणा वा एजेण्डा के छन् भन्ने विषयमा तु खबरले केही उम्मेदवारहरुसँग कुराकानी गरेको छ ।

अध्ययन गरिनुपर्छः महेश बर्तौला

नेकपा एमालेबाट प्रतिनिधिसभा क्षेत्र नम्वर २ का उम्मेदवार महेश बर्तौला विमानस्थल निर्माणका लागि सम्भाव्यता अध्ययन हुनुपर्ने बताउँछन् ।

आसन्न निर्वाचनमा युवा पुस्ताको प्रतिनिधित्व गर्ने वर्तौला भन्छन्, ‘हेटौंडा बागमती प्रदेशको राजधानी हो, यहाँ पूर्वाधारको हिसाबले केही कुरा पनि अभाव हुनु हुँदैन । यो विषय कुनै एउटा राजनीतिक दलले भन्दा पनि सबै राजनीतिक दलको साझा एजेण्डा हुनुपर्छ जस्तो लाग्छ ।’ ‘बन्छ र बनाउँछु नै भनेर दावी गर्न सक्दिन । तर, मेरो अग्रणी पहल भने हुनेछ ।’ उनले भने ।

संभव छैनः दीपक सिंह

राष्ट्रिय प्रजातन्त्र पार्टी राप्रपाबाट मकवानपुर प्रतिनिधिसभा क्षेत्र नम्वर १ का उम्मेदवार दिपकबहादुर सिंह हेटौंडामा विमानस्थल निर्माण सम्भव नभएको बताउँछन् ।

‘हेटौंडामा विमानस्थल निर्माण गर्ने कुरा सम्भव छैन । हेलिप्याडको विषयमा भने छलफल गरौँला ।’ उनले भने ।

बनाएरै छाड्ने संकल्प गरेको छुः इन्द्र बानियाँ

सत्तारुढ गठबन्धनको तर्फबाट मकवानपुर प्रतिनिधिसभा क्षेत्र नम्वर २ (ख) का उम्मेदवार इन्द्रबहादुर बानियाँले आफु पर्यटन राज्यमन्त्री हुँदा मकवानपुरमा आन्तरिक विमानस्थल बनाउँछु भनेर दृढ संकल्प गरेको स्मरण गर्दै त्यो संकल्प पूरा गरेरै छाड्ने बताए ।

नेपाली कांग्रेस बागमती प्रदेश सभापतिसमेत रहेका बानियाँले भने, ‘मकवानपुरमा विमानस्थल निर्माण गर्छु भनेर, मैले पर्यटन राज्यमन्त्री हुँदा दृढ संकल्प गरेको थिएँ । हामीले जिल्लाको दुई ठाउँमा सम्भाव्यता पनि अध्ययन गरेका थियौँ । बिज्ञहरुको समूहले यहाँ एयरपोर्ट निर्माण गर्न सम्भव छ भनी राय दिएको छ । विभानस्थल बनाउनै पर्छ, बनाएरै छाड्छु । त्यसमा सबैको सहयोग आवश्यक छ ।’

बिज्ञको टोलीबाट ५५ सिट क्षमतासम्मको विमानका लागि हेटौंडामा एयरपोर्ट बनाउन उपयुक्त छ भनी सल्लाह प्राप्त भएको बानियाँले बताए ।

बानियाँ २०७३ मा जीवनबहादुर शाही पर्यटनमन्त्री हुँदा राज्यमन्त्री नियुक्त भएका थिए ।

अति आवश्यक छः एकलाल श्रेष्ठ

नेकपा एमालेबाट मकवानपुर प्रतिनिधिसभा क्षेत्र नम्वर १ को प्रदेशसभा (ख) का उम्मेदवार एकलाल श्रेष्ठ प्रदेश राजधानी हेटौंडामा विमानस्थल अति आवश्यक भएको बताउँछन् ।
विगतमा पनि पटकपटक यो विषयमा कुरा उठेको हो । छलफल गरेर एजेण्डाकै रुपमा समावेश गरेर अघि बढ्ने श्रेष्ठको भनाई छ ।