मकवानपुरमा एयरपोर्ट बनाउने दृढ संकल्प गरेको छुः इन्द्रबहादुर बानियाँ
तु खबर संवाददाता
मकवानपुर । नेपाली कांग्रेस बागमती प्रदेश सभापति इन्द्रबहादुर बानियाँले मकवानपुरमा एयरपोर्ट अतिआवश्यक भएकाले बनाएरै छोड्ने बताएका छन् ।
तु खबरसँग कुराकानी गर्दै बानियाँले आफु पर्यटन राज्यमन्त्री हुँदा मकवानपुरमा आन्तरिक विमानस्थल बनाउँछु भनेर दृढ संकल्प गरेको स्मरण गर्दै चाँडै संकल्प पूरा गर्ने बताए ।
सत्तारुढ गठबन्धन दलको तर्फबाट मकवानपुर क्षेत्र नम्वर–२ को प्रदेशसभा (ख) का उम्मेदवारसमेत रहेका उनले विमानस्थल निर्माण गर्ने विषय निकै महत्वपूर्ण भएकाले चुनावी एजेण्डामा नै समावेश गरेर प्राथमिकताका साथ अघि बढाएको बताए ।
‘मकवानपुरमा विमानस्थल निर्माण गर्छु भनेर, मैले पर्यटन राज्यमन्त्री हुँदा दृढ संकल्प गरेको थिएँ । हामीले जिल्लाको दुई ठाउँमा सम्भाव्यता पनि अध्ययन गरेका थियौँ । बिज्ञहरुको समूहले यहाँ एयरपोर्ट निर्माण गर्न सम्भव छ भनी राय दिएको छ । विभानस्थल बनाउनै पर्छ, बनाएरै छाड्छु । त्यसमा सबैको सहयोग आवश्यक छ ।’ उनले भने ।
बिज्ञको टोलीबाट ५५ सिट क्षमतासम्मको विमानका लागि हेटौंडामा एयरपोर्ट बनाउन उपयुक्त छ भनी सल्लाह प्राप्त भएको बानियाँले बताए ।
बानियाँ २०७३ मा जीवनबहादुर शाही पर्यटनमन्त्री हुँदा राज्यमन्त्री नियुक्त भएका थिए ।
