कारोबार घट्दै जाँदा शेयर बजार सुस्त, केही कम्पनीमा सकारात्मक सर्किट

काठमाडौँ। मंगलबारपछि बुधबार पनि शेयर बजार झिनो अंकले ओरालो लागेको छ। पछिल्ला केही दिनयता बजार सुस्त गतिमा अघि बढिरहेको छ भने कारोबार रकमसमेत निरन्तर घट्दै गएको छ। नयाँ लगानी भित्रिनुको सट्टा लगानीकर्तामा ‘पर्ख र हेर’को प्रवृत्ति देखिँदा बजारको सक्रियता कमजोर बनेको विश्लेषकहरूले बताएका छन्। सूचक सामान्य रूपमा घटे पनि कारोबार रकम उल्लेखनीय रूपमा नबढ्नुले लगानीकर्ताको भरोसा अझै पूर्ण रूपमा स्थापित नभएको संकेत गरेको छ।

यसैबीच, बैंक तथा वित्तीय संस्थाहरूले सार्वजनिक गरेका दोस्रो त्रैमासिक वित्तीय विवरणले पनि बजारमा सतर्कता बढाएको छ। कतिपय संस्थाको नाफा, कर्जा विस्तार तथा सम्पत्ति गुणस्तर अपेक्षाभन्दा कमजोर देखिँदा लगानीकर्तामा डर र अनिश्चितता बढेको विश्लेषकहरूको धारणा छ। यसले शेयर बजारमा अल्पकालीन अस्थिरता थपिएको देखिन्छ।

देशमा प्रतिनिधिसभा निर्वाचन नजिकिँदा केही समयका लागि पुँजी बजारमा उत्साह देखिए पनि सुधार देखिनासाथ नाफा बुक गर्ने प्रवृत्ति बढ्दा बजार दीर्घकालीन रूपमा टिक्न सकेको छैन। भावी सरकार र आर्थिक नीतिबारे स्पष्टता नहुँदा लगानीकर्तामा अनिश्चितता कायमै रहेको छ, जसले बजारमा उतार–चढाव र सतर्कता बढाएको छ।

यद्यपि, बैंक तथा वित्तीय संस्थाहरूको ब्याजदर क्रमशः घट्दै गएको र पूँजी बजारप्रति सरकार तथा नियामक निकायले उदार नीति लिने संकेत गरेका कारण निकट भविष्यमा बजार स्थायित्वतर्फ उन्मुख हुने अपेक्षा गरिएको छ। विज्ञहरूले संयमित रणनीतिका साथ दीर्घकालीन लगानी गरेमा क्रमिक सुधार सम्भव हुने बताएका छन्।

बुधबार नेपाल स्टक एक्सचेञ्ज (नेप्से) परिसूचक १.६४ अंकले घटेर २६८१.५० बिन्दुमा कायम भएको छ। यसदिन ३२६ कम्पनीको १ करोड ६६ लाख ८२ हजार कित्ता शेयर किनबेच हुँदा कुल कारोबार रकम ७ अर्ब ४९ करोड ९७ लाख रुपैयाँ पुगेको छ।

कारोबारका क्रममा ६ उपसूचक घटेका छन्। वाणिज्य बैंक समूह ०.३२ प्रतिशत, जीवन बीमा समूह ०.१३ प्रतिशत र माइक्रोफाइनान्स समूह ०.३० प्रतिशतले ओरालो लागेका छन्। बुधबार ११३ कम्पनीको शेयर मूल्य बढेको छ भने १३४ कम्पनीको घटेको छ। १३ कम्पनीको शेयर मूल्य स्थिर रहेको छ।

यसैदिन बजारमा केही कम्पनीका शेयरमा उत्साह देखिएको छ। कालिन्चोक दर्शन, सुपरमाई हाइड्रोपावर, सुपरमादी हाइड्रोपावर र आँखु खोला जलविद्युत कम्पनीको शेयर मूल्यमा सकारात्मक सर्किट लागेको छ। त्यस्तै, कर्पोरेट डेभलपमेन्ट बैंक, बिन्द्यावासिनी हाइड्रोपावर र मेन्छियाम हाइड्रोपावरजस्ता कम्पनीका लगानीकर्ताले राम्रो प्रतिफल कमाएका छन्।