राताम्य पुँजी बजारः लगानीकर्ताको लगानी डुब्दै, कहिलेसम्म हुन्छ गिरावट ?

काठमाडौँ । गत शुक्रबार झिनो अंकले सुधार देखाएको शेयर बजार पुनः आइतबार ओरालो लागेको छ । पछिल्लो समय बजार निरन्तर खुम्चिदै जाँदा लगानीकर्ताको मनोबल कमजोर भएको छ ।

बैंक तथा वित्तीय संस्थाले लाभांश क्षमता बलियो देखिने वित्तीय विवरण सार्वजनिक गरिसके पनि त्यसले बजारमा सकारात्मक प्रभाव पार्न सकेको छैन । विश्लेषकहरूका अनुसार बजारमा माफियाको प्रभाव र उच्च मूल्यमा खरिद गर्ने प्रवृत्तिले अस्थिरता बढाइरहेको छ । मौद्रिक नीतिले केही समय बजारमा सकारात्मक संकेत दिएको भए पनि पछिल्ला हप्तामा सूचक निरन्तर घट्दा लगानीकर्ताको उत्साह हराउँदै गएको छ ।

बजार निरन्तर घट्दै जाँदा तत्काल स्थिरता ल्याउन सकिने अवस्था नरहेको विशेषज्ञहरूको भनाइ छ । उनीहरूका अनुसार सुधारका लागि अझै समय लाग्ने देखिन्छ र यसबीच लगानीकर्ताले सावधानी अपनाउनु आवश्यक छ ।

नेपाल स्टक एक्सचेञ्ज (नेप्से) २५.७० अकंले घटेरर २७६२.६६ बिन्दुमा कायम भएको छ । आज ३१७ कम्पनीको २ करोड ५ लाख १३ हजार कित्ता शेयर किनबेच हुँदा ७ अर्ब ७३ करोड ५१ लाख रुपैयाँको कारोबार भएको हो ।

यसदिन १२ वटा उपसूचक राताम्य भएका छन् । आज वाणिज्य बैंक समूहको ०.९३ प्रतिशत, विकास बैंक समूहको ०.४९ प्रतिशत, फाइनान्स समूहको ०.९० प्रतिशतले शेयर मूल्य घटेको छ ।