शेयरबजार सामान्य करेक्सनमा, लगानीकर्ताको मनोबल बलियो

काठमाडौँ । नेपाली शेयर बजारमा सोमबार पनि सामान्य गिरावट देखिएको छ। गत शुक्रबारदेखि निरन्तर ओरालो लागेको बजार आज झिनो अंकले घट्दै बन्द भएको हो। नेपाल स्टक एक्सचेञ्ज (नेप्से) परिसूचक ४.१८ अंकले घटेर २८३३.६० बिन्दुमा कायम भएको छ।

आज कुल २ करोड १ लाख ६३ हजार कित्ता शेयर किनबेच हुँदा ८ अर्ब ६६ करोड ५५ लाख ६८ हजार रुपैयाँ बराबरको कारोबार भएको छ। कारोबार रकम केही सुस्त देखिए पनि बजारमा ठूलो उतार–चढाव भने देखिएको छैन।

यस दिन नेशनल हाइड्रो, रिडि पावर, रिलायन्स मिल्स, आखुखोला जलविद्युत र एसवाई प्यानल्स लगायतका कम्पनीहरूको शेयरमा उच्च कारोबार भएको छ।

उपसूचकतर्फ हेर्दा ७ वटा समूह घटेका छन्। वाणिज्य बैंक समूह ०.४७ प्रतिशत, विकास बैंक ०.५५ प्रतिशत, फाइनान्स ०.२९ प्रतिशत, जीवन बीमा ०.४६ प्रतिशत तथा माइक्रोफाइनान्स समूह ०.४२ प्रतिशतले घटेका छन्।

कुल १०५ कम्पनीको शेयर मूल्य बढ्दा १५३ कम्पनीको घटेको छ भने १२ कम्पनीको मूल्य स्थिर रहेको छ।

यद्यपि, विश्लेषकहरूले हालको गिरावटलाई सामान्य करेक्सनका रूपमा व्याख्या गरेका छन्। बजारमा लगानीकर्ताको सतर्कता बढेको देखिए पनि समग्र वातावरण सकारात्मक रहेको बताइएको छ। स्थायी सरकार, नीतिगत स्थिरता, घट्दो ब्याजदर तथा अर्थतन्त्रमा देखिएको सुधारले दीर्घकालीन रूपमा बजारलाई बलियो बनाउने अपेक्षा गरिएको छ।

यस्तै, अर्थमन्त्रीले शेयर बजारमा सम्पत्ति शुद्धीकरणसम्बन्धी कुनै आशंका नरहेको स्पष्ट पारेपछि लगानीकर्ताको मनोबल थप मजबुत बनेको छ। यसले बजारप्रति विश्वास बढाएको छ।

छोटो अवधिमा केही दबाब देखिए पनि दीर्घकालीन लगानीकर्ताले अहिलेको अवस्थालाई राम्रो कम्पनीमा लगानी गर्ने अवसरका रूपमा लिएका छन्। त्यसैले आगामी दिनमा बजार पुनः उकालो यात्रामा फर्किने अपेक्षा गरिएको छ।