माओवादी केन्द्रको स्थगित अभियान भदौ २१ गतेदेखि पुनः सुरु हुने
तु खबर संवाददाता
काठमाडौँ । नेकपा (माओवादी केन्द्र)ले स्थगित मध्यपहाडी लोकमार्ग केन्द्रित अभियान भदौ २१ गतेदेखि पुनः सुरु गर्ने भएको छ। साउन १६–१९ गतेसम्म बसेको पार्टी स्थायी समिति बैठकले जनजागरण अभियान बाँकी रहेका जिल्लामा सञ्चालन गर्ने निर्णय गरेको थियो।
पार्टी प्रवक्ता एवं उपाध्यक्ष अग्नी सापकोटाका अनुसार अभियान लमजुङबाट सुरु हुने तय भएको छ। महासचिव देवप्रसाद गुरुङले बुधबार पठाएको सर्कुलरअनुसार अध्यक्ष पुष्पकमल दाहाल ‘प्रचण्ड’ नेतृत्वको टोली भदौ २१ गते लमजुङमा बास बस्दै अभियान थाल्नेछ। यस पटक प्रचण्डसँगै वरिष्ठ उपाध्यक्ष, उपाध्यक्षहरू र महासचिव मात्र रहनेछन्।
कार्यक्रमअनुसार भदौ २१ र २२ गते बिहान लमजुङ, २२ गते दिउँसो र २३ गते गोरखा, २४ गते धादिङ र २५ गते नुवाकोटमा अभियान केन्द्रित सभा तथा अन्तरक्रिया हुनेछन्। अध्यक्ष प्रचण्डले सबै जिल्लामा हुने सभालाई सम्बोधन गर्ने तयारी छ।
महासचिव गुरुङका अनुसार यस पटक अभियान टोली सानो र चुस्त बनाइएको छ, जसले व्यवस्थापन र कार्यविभाजन सहज बनाउने अपेक्षा गरिएको छ। यद्यपि हाल पार्टी अध्यक्ष प्रचण्ड र उपमहासचिव जनार्दन शर्माबीच अन्तरसंघर्ष बढेको सन्दर्भमा महासचिवसम्म मात्र सहभागी हुने निर्णयलाई लिएर आशंका उत्पन्न भएको पनि देखिएको छ।
माओवादी केन्द्रले गत जेठ २१ गते वर्षाका कारण पोखरासम्म आइपुगेर अभियान स्थगित गरेको थियो। यसअघि पहिलो चरणको अभियान फागुन १२ गते झापाको कचनकवलबाट सुरु भएर वैशाख १७ गते कञ्चनपुरको महेन्द्रनगरमा सम्पन्न भएको थियो।
महासचिव गुरुङले मौसमी प्रतिकूलता भए फेरि पनि अभियान स्थगित हुन सक्ने बताएका छन्। योजना अनुसार भने अभियान अन्ततः सोलुखुम्बु, विश्वकै सबैभन्दा उचाइमा पर्ने जिल्लासम्म पुगेर सम्पन्न गरिनेछ।
