भियतनामकी उपराष्ट्रपति सुआन नेपालको औपचारिक भ्रमणमा
तु खबर संवाददाता
काठमाडौं । समाजवादी गणतन्त्र भियतनामकी उपराष्ट्रपति भो थि आन सुआन तीनदिने औपचारिक भ्रमणका लागि शनिबार काठमाडौं आइपुगेकी छिन् । उपराष्ट्रपति रामसहायप्रसाद यादवको मैत्रीपूर्ण निमन्त्रणामा नेपाल आइपुगेकी उनलाई त्रिभुवन विमानस्थलमा परराष्ट्रमन्त्री आरजु राणालगायतका अधिकारीहरूले स्वागत गरेका थिए ।
भियतनामको तर्फबाट यो नेपालमा भएको पहिलो उच्चस्तरीय भ्रमण हो । भ्रमणका क्रममा उपराष्ट्रपति यादव र उनका समकक्षी सुआनबीच भदौ ८ गते काठमाडौँमा प्रतिनिधिमण्डलस्तरीय द्विपक्षीय वार्ता हुने परराष्ट्र मन्त्रालयले जनाएको छ । साथै, उनले नेपालका अन्य उच्चपदस्थ व्यक्तित्वसँग शिष्टाचार भेटवार्ता गर्ने कार्यक्रमसमेत रहेको छ ।
यस वर्ष नेपाल–भियतनाम कूटनीतिक सम्बन्ध स्थापना भएको ५० औं वर्षगाँठ परेकाले यस भ्रमणलाई विशेष महत्वका साथ हेरिएको छ । उपराष्ट्रपति सुआनले भ्रमण सम्पन्न गरी भदौ ९ गते स्वदेश फर्किने कार्यक्रम रहेको छ ।
