उपसभामुखलाई हटाउने कार्य अधिनायकवादतर्फको संकेत :प्रचण्ड

काठमाडौं । नेकपा (माओवादी केन्द्र) का अध्यक्ष तथा प्रमुख प्रतिपक्षी दलका नेता पुष्पकमल दाहाल ‘प्रचण्ड’ ले प्रतिनिधिसभाकी उपसभामुख इन्दिरा रानालाई पदच्युत गर्ने सत्तापक्षको तयारीको कडा विरोध गर्ने बताएका छन् ।

मंगलबार पार्टी केन्द्रीय कार्यालय पेरिसडाँडामा सञ्चारकर्मीहरूसँग कुरा गर्दै प्रचण्डले कांग्रेस–एमालेले उपसभामुखलाई हटाउन खोज्नु ठुलो गल्ती हुने चेतावनी दिए । उनले सामाजिक सेवामा सक्रिय आदिवासी जनजाति महिलालाई अनाहकमा लक्षित गर्ने प्रयास गलत भएको जिकिर गर्दै, रानामाथि लगाइएका आरोप कपोकल्पित भएको दाबी गरे ।

यसै विषयमा बसेको माओवादी केन्द्रको पदाधिकारी बैठकले पनि उपसभामुखलाई हटाउन खोजेर सरकारले अधिनायकवादी तथा निरङ्कुशताको बाटो समात्न लागेको निष्कर्ष निकालेको छ । बैठकका निर्णयबारे जानकारी दिँदै पार्टी सचिव गंगा श्रेष्ठले विपक्षी दलको नेताको हैसियतले प्रचण्डले नै अब आवश्यक पहलकदमी गर्ने जिम्मा पाएको बताए ।

‘सत्ता गठबन्धनले उपसभामुखलाई हटाउने तयारी गरेकाले बैठक लामो समय चल्न सकेन,’ श्रेष्ठले भने, ‘बैठकले सरकार निरङ्कुशतर्फ अघि बढेको निष्कर्ष निकालेको छ ।’

यसैबीच, सत्तारुढ दल एमाले र कांग्रेसका सांसदहरूले रानाविरुद्धको प्रस्तावमा हस्ताक्षर संकलन गरिसकेका छन् भने सत्ता गठबन्धनको बैठक सिंहदरबारमा जारी रहेको छ ।