पुँजी बजार फेरि राताम्य, त्रसित लगानीकर्ता शेयर बिक्री तिर हाबि

काठमाडौँ — पुँजी बजार सोमबार पुनः राताम्य बनेको छ। गत बिहीबारको वृद्धि पछि बजार आज फेरि ओरालो लाग्दै लगानीकर्ताको मनोबल कमजोर बनेको छ। चालु आर्थिक वर्षको मौद्रिक नीतिको प्रभावमा केही समय उकालो लागेको बजार पछिल्ला दिनमा लगातार खुम्चिँदै आएको हो।

केही साताअघि नेप्से ३००० बिन्दु पार गरेपछि ३२०० माथि पुग्ने अपेक्षामा उत्साहित भएर शेयर खरिद गरेका लगानीकर्ताहरू अहिले घाटामा परेका छन्। माफियाको प्रभावमा बजार नयाँ रेकर्ड राख्ने आशमा गरेको लगानी ‘बालुवामा पानी’ जस्तै हराएको छ, जसका कारण लगानीकर्तामा आक्रोश बढेको छ।

गत आर्थिक वर्ष २०८१/८२ का बैंक तथा वित्तीय संस्थाहरूको वित्तीय प्रतिवेदन सार्वजनिक हुँदैछ। अधिकांश कम्पनीको नाफा र लाभांश क्षमता बलियो देखिए पनि यसको प्रत्यक्ष प्रभाव बजारमा देखिएको छैन। विगतमा अस्वाभाविक नाफा देखाएका केही कम्पनी टाटपल्टिएका अनुभवका कारण लगानीकर्ताले हालको सकारात्मक रिपोर्टमाथि पूर्ण विश्वास गर्न सकेका छैनन्।

नेपाल स्टक एक्सचेञ्ज (नेप्से) सूचक आज २७.९० अंकले घटेर २८२२.४६ बिन्दुमा कायम भएको छ। ३२४ कम्पनीको २ करोड ५० लाख १९ हजार कित्ता शेयर किनबेच हुँदा १० अर्ब १८ करोड १४ लाख रुपैयाँको कारोबार भएको छ।

समूहगत रुपमा हेर्दा विकास बैंक २.४३ प्रतिशत, माइक्रोफाइनान्स २.३३ प्रतिशत, फाइनान्स १.३१ प्रतिशत र होटल तथा पर्यटन १.०६ प्रतिशतले घटेका छन्। विकास बैंक र लघुवित्तको सकारात्मक रिपोर्ट आए पनि मूल्य बढ्न नसक्नु बजारको सुस्त गतिलाई स्पष्ट देखाउँछ।