हेटौंडामा दुर्घटना अपडेट : मृतकमध्ये एक जनाको सनाखत

मकवानपुर । पूर्वपश्चिम राजमार्ग अन्तरगत हेटौंडा उपमहानगरपालिकाको नवलपुलस्थित सडकखण्डमा गएराति भएको सवारी दुर्घटनामा परेर मृत्यु भएका दुई जनामध्ये एक जनाको सनाखत भएको छ । मृत्यु हुनेमा ना ७ ख ८७६ नम्वरको रात्री बस चालक चन्द्रागिरी नगरपालिका वडा नम्वर २ बस्ने २९ वर्षीय सरोज परियार रहेको जिल्ला प्रहरी कार्यालय मकवानपुरका प्रहरी नायव उपरीक्षक जयश्वर रिमालले जानकारी दिए ।

प्रहरी नायव उपरीक्षक रिमालका अनुसार, गएराति जनकपुरबाट काठमाडौँतर्फ जान आइरहेको ना ७ ख ८७६ नम्वरको रात्री बस र विपरित दिशाबाट आइरहेको प्रदेश नम्वर २– ०३०१ ख ५०३५ नम्वरको ट्रक आपसमा ठोक्किएर दुर्घटना हुँदा दुई जनाको मृत्यु भएको थियो । तीमध्ये परियारको सनाखत भएको हो । अर्का एक जनाको भने हाल सनाखत हुन नसकेको र उक्त घटनाको विषयमा आवश्यक अनुसन्धान भइरहेको छ । यस्तै, सोही दुर्घटनामा परेर १८ जना घाइते भएका छन् । घाइतेहरुमध्ये १५ जनाको चुरेहिल अस्पतालमा र ३ जनाको मकवानपुर सहकारी अस्पतालमा उपचार भइरहेको प्रहरी नायव उपरीक्षक रिमालले बताए ।