सप्तरीमा थप ५० जनामा कोरोना पुष्टि
सप्तरी । सप्तरीमा थप ५० जनामा कोरोना भाइरस (कोभिड–१९) संक्रमण पुष्टि भएको छ । राजविराजका ४४ जनासहित थप ५० जनामा कोरोना संक्रमण पुष्टि भएको हो ।
संक्रमितहरुमा जिल्ला अदालतका स्रेस्तेदारलगायत ५ कर्मचारी, जिल्ला प्रशासन कार्यालयका २ कार्यालय सहायक, एक प्रहरी र एक भान्से रहेको स्वास्थ्य कार्यालयले जानकारी दिएको छ ।
सङ्क्रमित थप भएकामा राजविराज नगरपालिकाको विभिन्न वडाका ४४ र हनुमाननगर कङ्कालिनी नगरपालिका, शम्भुनाथ नगरपालिका र महादेवा गाउँपालिकाका ६ जना सङ्क्रमित रहेका छन् ।
योसहित सप्तरीमा सङ्क्रमित हुनेको सङ्ख्या १ हजार ९० पुगेको स्वास्थ्य कार्यालयले जनाएको छ । सङ्क्रमितमध्ये ७ सय ३६ जना निको भएर घर फर्किएका छन् ।
त्यस्तै सप्तरीमा संक्रमणबाट ९ जनाको मृत्यु भएको छ ।