अरु भिसा स्थगित गरेर भएपनि डिभी विजेतालाई भिसा दिन दूतावासहरुलाई निर्देशन

खसोखास डटकमबाट
२०७७ भाद्र ३१,बुधबार ०१:५१

अमेरिकी सरकारको विदेश मन्त्रालयले आफ्ना दूतावास र कन्सुलेटहरुलाई अरु भिसा स्थगित गरेर भएपनि डिभी विजेताहरुलाई प्राथमिकताका साथ भिसा जारी गर्न निर्देशन दिएको जनाएको छ । स्थानीय स्वास्थ्य अवस्था र साधनश्रोतले साथ दिएसम्म दूतावास र कन्सुलेटहरुलाई डिभी विजेताका लागि भिसा जारी गर्न निर्देशन दिइएको हो ।
यसैबीच आज डिभी सम्बन्धि निर्देशिकामा अपडेट गर्दै अमेरिकी विदेश मन्त्रालयले चीन, इरान, युरोपको शेंगेन क्षेत्र, युके, आयरल्याण्ड र ब्राजिलमा विगत १४ दिनको अवधिमा भ्रमण गरेकाहरुलाई समेत डाइभर्सिटी भिसा जारी गरिने स्पष्ट पारेको छ । यसअगाडि विगत १४ दिनको अवधिमा ती देशको भ्रमण गरेकाहरुलाई १४ दिन पूरा नभएसम्म आप्रवासी भिसा जारी नगरिने उल्लेख गरिएको थियो ।
तर आज अपडेट गरिएको निर्देशिकामा बर्मा, इरिटेरिया, इरान, क्रिगिस्तान, लिबिया, नाइजेरिया, नर्थ कोरिया, सोमालिया, सुडान, तान्जिनिया र यमनका नागरिकलाई भने वेभर वा अपवादका लागि योग्य नभएसम्म डाइभर्सिटी भिसा जारी नगरिने उल्लेख गरिएको छ ।
अमेरिकी सरकारको विदेशमन्त्रालय ब्यूरो अफ कन्सुलर अफेयर्स गत साता एक सुचना जारी गर्दै पहिले नै अन्तरवार्ता भइसकेका वा तय भएका सन् २०२० का डिभी विजेतालाई भिसा दिइने स्पष्ट पारेको थियो । अमेरिकाको संघीय अदालतले सन् २०२० को डिभी विजेताहरुलाई भिसा नरोक्न आदेश दिएपछि अमेरिकी सरकारले यो कदम चालेको हो ।
मुद्दाका वादीहरुलाई पहिलो प्राथमिकता दिइने भएको छ भने पहिले नै भिसा अन्तरवार्ता भइसकेका तर भिसा जारी हुन बाँकी रहेकाहरुलाई दोश्रो प्राथमिकता दिइने भएको छ । यस अन्तरगत विगतको भिसा अस्वीकृतिलाई जित्न चाहेका, प्रशासनिक प्रकृयामा रहेका र पुन भिसा जारी हुनका लागि पर्खेकाहरुलाई प्राथमिकता दिइनेभएको छ ।
त्यसपछि मार्च, अप्रिल र मे महिनामा अन्तरवार्ताको मिति तय भएका तर कोरोना महामारीका कारण अन्तरवार्ता दिन नपाएकाहरुलाई तेश्रो प्राथमिकता दिइने भएको छ । यीबाहेकका भिसा प्रकृया अगाडि बढाइसकेपछि अरु आवेदनहरु अगाडि बढाउनका लागि कन्सुलेटमा क्षमता भएको खण्डमा अन्य आवेदनलाई समेत अगाडि बढाइने जनाइएको छ ।
सन् २०२० को डिभी लोटरी जितेकाहरुले यही सेप्टेम्बर ३० भित्र भिसा प्राप्त गर्नुपर्ने प्रावधान रहेको छ । तर राष्ट्रपति डोनाल्ड ट्रम्पको कार्यकारी आदेशले गत अप्रिलदेखि सन् २०२० का डिभी विजेताहरुलाई भिसा प्राप्त गर्नमा रोक लगाएको थियो ।
विश्वका अधिकांश अमेरिकी दूतावासहरु कोरोना महामारीका कारण सिमित सेवाका साथमामात्र संचालनमा रहेका छन् । अधिकांश दूतावासहरुमा नियमित भिसा सेवा स्थगित गरिएको छ । काठमाडौंमा रहेको अमेरिकी दूतावासमा पनि नियमित भिसा सेवा अबरुद्ध रहेको छ ।
त्यस्तै राष्ट्रपति ट्रम्पको कार्यकारी आदेश डिसेम्बर ३१ सम्मका लागि रहेकाले डिभी २०२० का विजेताहरुले भिसा प्राप्त गरेपनि डिसेम्बर ३१ सम्ममा अमेरिका आउनमा भने रोक लाग्नसक्ने विदेश मन्त्रालयले जनाएको छ । डिभी विजेताहरुले ट्रम्पको कार्यकारी आदेशमा दिइएको छुट प्राप्त नगरेसम्म भिसा प्राप्त गरेपनि डिसेम्बर ३१ अगाडि अमेरिका आउन नसक्ने जनाइएको छ ।
आगामी डिसेम्बर ३१ अगाडि नै भिसाको म्याद सकिने डिभी विजेताहरु उक्त भिसामा अमेरिका आउन नसक्ने जनाइएको छ । त्यस्तै सन् २०२० को सेप्टेम्बर ३० पछि २०२० का डिभी विजेताहरुलाई नयाँ भिसा जारी गर्न नसकिने पनि विदेशमन्त्रालयले स्पष्ट पारेको छ ।
अप्रिल २३ भन्दा अगाडि नै भिसा प्राप्त गरेका तर अमेरिका आउन नसकेकाहरुलाई भने राष्ट्रपति ट्रम्पको कार्यकारी आदेशले कुनै असर गर्नेछैन । उनीहरुको भिसा समाप्त भएको खण्डमा सेप्टेम्बर ३० भन्दा अगाडि नयाँ भिसा समेत जारी गर्न सकिनेछ । र उनीहरु डिसेम्बर ३१ भन्दा अगाडि नै अमेरिका आउन सक्नेछन् ।तर अप्रिल २२ मै भिसा सकिएकाहरुलाई भने दूतावासले भिसा जारी गर्न अस्वीकार गरिरहेको छ ।
अप्रिल २३ वा त्यो पछि भिसा सकिएकाहरुलाई नयाँ भिसा जारी गर्न अमेरिकी दूतावास काठमाडौंले यो फर्मको व्यवस्था गरेको छ ।
पहिले नै अन्तरवार्ता तय भएका तर कोरोनाको कारण अन्तरवार्ता दिन नसकेकाहरुलाई सिधै दूतावासमा सम्पर्क गर्न सुझाव दिइएको छ । यदि कुनै कन्सुलेटले कोरोनाको महामारीका कारण भिसा प्रकृयामा लैजान नसकेको खण्डमा आवेदकले अर्को कन्सुलेटमा वा पोष्टमा सार्नका लागि समेत अनुरोध गर्नसक्नेछन् । आवेदकले आफूले चाहेको पोष्टमा सिधै सम्पर्क गरेर समेत सार्नसक्ने जनाइएको छ ।

संयुक्त राज्य अमेरिकाबाट संचालित khasokhas.com र नेपालबाट संचालित tukhabar.com बीचको सहकार्यका आधारमा साभार गरिएको सामग्री । सम्पादक