मकवानपुरको चित्लाङबाट महिलासहित ५ जना पक्राउ
हेटौंडा, १५ फागुन । मकवानपुरको थाहा नगरपालिकास्थित चित्लाङमा जुवा खेल्दै गरेका ५ जना पक्राउ परेका छन् । प्रहरी टोलीले जुवाखालबाट तास र नगद ६४ हजार ७ सय पनि बरामद गरेको छ ।
थाहा नगरपालिका वडा नं. ९ चित्लाङमा अवस्थित एक घरमा जुवा खेल्ने–खेलाउने कार्य भईरहेको सूचनाको आधारमा इलाका प्रहरी कार्यालय, पालुङबाट गएको प्रहरी टोलीले ५ जना जुवाडेलाई पक्राउ गरेको प्रहरीले जनाएको छ ।
पक्राउ पर्नेमा थाहा नगरपालिका–९ का सुकदेव बस्नेत, सुदर्शन भट्टराई, सानुकान्छा गोले, रामकुमार स्याङतान र सानुमाया बलामी रहेका छन् । उनीहरुलाई पक्राउ गरी आवश्यक अनुसन्धान भइरहेको प्रहरीले जनाएको छ ।
यस अघि जुवा, तास खेल्ने, चोरी तथा अन्य आपराधिक गतिविधीहरु बढेपछि प्रहरीले अहिले नियन्त्रणका लागि कडा अभियान थालेको छ ।