अवैध लागूऔषधसहित डेण्डी,सुनार र यादव पक्राउ

काठमाडौं, २२ चैत / काठमाडौं महानगरपालिका-६ बौद्ध तीनचुलीबाट अवैध लागूऔषध खैरो हेरोइन करिब २ ग्राम सहित काठमाडौं गौशाला बस्ने सोलुखुम्बु घर भएका २७ वर्षीय निमा डेण्डीलाई प्रहरीले पक्राउ गरेको छ ।

महानगरीय प्रहरी वृत्त बौद्धबाट खटिएको प्रहरीले बा।३४ प ३७४६ नम्बरको मोटरसाइकल जाँच गर्ने क्रममा चालक डेण्डीलाई लागूऔषध सहित फेला पारी पक्राउ गरेको हो ।

सर्लाही, लालबन्दी नगरपालिका-१२ जियाजोरबाट अवैध लागूऔषध गाँजा करिब ५ केजी सहित २ जनालाई शुक्रबार राति प्रहरीले पक्राउ गरेको छ ।

पक्राउ पर्नेहरुमा लालबन्दी नगरपालिका-१२ बस्ने ३२ वर्षीय राजन सुनार र ईश्वरपुर नगरपालिका-९ बस्ने १९ वर्षीय सरोज यादव रहनुभएको छ ।

इलाका प्रहरी कार्यालय लालबन्दीबाट खटिएको प्रहरीले बिआर ३० एच ७१४१ नम्बरको मोटरसाइकल जाँच गर्ने क्रममा मोटरसाइकलमा सवार उहाँहरुलाई लागूऔषध सहित फेला पारी पक्राउ गरेको प्रहरीले जानकारी दिएको छ ।

खुकुरी प्रहार गरी हत्या गरेको अभियोगमा राई पक्राउ

पाँचथर, २२ चैत / धारिलो हतियार प्रहार गरी छिमेकीको हत्या गरेको अभियोगमा मिक्लाजुङ गाउँपालिका-७ लेकगाउँ बस्ने २६ वर्षीय रामचन्द्र राईलाई शुक्रबार राति प्रहरीले पक्राउ गरेको छ ।

राईले गत शनिबार सोही ठाउँ बस्ने ५१ वर्षीया गंगा देवी राई लगायत ४ जनालाई खुकुरी प्रहार गर्दा घाइते भएको भन्ने खबर प्राप्त हुनासाथ ईलाका प्रहरी कार्यालय खान्द्रुङ र ईलाका प्रहरी कार्यालय रबिबाट खटिएको प्रहरीले घाइतेहरुलाई उपचारको लागि विपी कोइराला स्वास्थ्य विज्ञान प्रतिष्ठान ९घोपा० धरान सुनसरी पठाएकोमा गंगा देवी राईको उपचारको क्रममा शुक्रबार मृत्यु भएको थियो ।

अन्य घाइतेहरु उपचार पश्चात डिस्चार्ज भएका छन् ।

धारिलो हतियार प्रहार गरी घाइते बनाएको अभियोगमा लिम्बु पक्राउ

मोरङ, २२ चैत /छिमेकीलाई धारिलो हतियार छुरा प्रहार गरी घाइते बनाएको अभियोगमा पथरी शनिश्चरे नगरपालिका-१ सुनाखरी चोक बस्ने २७ वर्षीय बिजय लिम्बुलाई प्रहरीले पक्राउ गरेको छ ।

जग्गाको साँध सिमानाको बिषयको विवादमा लिम्बुले छिमेकी ६५ वर्षीय दिलिप तामाङलाई छुरा प्रहार गर्दा घाइते भएको खबर प्राप्त हुनासाथ ईलाका प्रहरी कार्यालय पथरीबाट खटिएको प्रहरीले लिम्बुलाई पक्राउ गरेको हो । घाइते दिलिपको पथरी अस्पतालमा उपचार भइरहेको छ ।

यसैगरी धारिलो हतियार चक्कु प्रहार गरी घाइते बनाएको अभियोगमा बिराटनगर महानगरपालिका-४ डेरा गरी बस्ने पाँचथर घर भएका २६ वर्षीय काजी गुरुङलाई प्रहरीले पक्राउ गरेको छ ।

सामान्य बिवादको कारण गुरुङले सोही स्थान डेरा गरी बस्ने २५ वर्षीय बिशाल थापालाई कुटपिट तथा चक्कु समेत प्रहार गर्दा घाइते भएको खबर प्राप्त हुनासाथ खटिएको प्रहरीले गुरुङलाई पक्राउ गरेको हो । घाइते थापाको लाईफ गार्ड अस्पताल बिराटनगरमा उपचार भइरहेको छ ।

घरेलु मदिरा ओसारपसार गर्ने सुनिल पक्राउ

काठमाडौं, २२ चैत / लकडाउनको अवस्थामा घरेलु मदिरा ओसारपसार गर्ने ललितपुर सानेपा घर भई हाल काठमाडौं चन्द्रागिरी नगरपालिका-१० सतुंगल बस्ने ४० वर्षीय सुनिल महर्जनलाई शनिबार बिहान प्रहरीले पक्राउ गरेको छ ।

चन्द्रागिरी नगरपालिका-१२ गुर्जुधारामा थानकोटदेखि कलंकीतर्फ जाँदै गरेको बा।३८ प ९१४७ नम्बरको मोटरसाइकलमा २२ लिटर घरेलु मदिरा ओसारपसार गरिरहेको अवस्थामा महानगरीय प्रहरी वृत्त थानकोटबाट खटिएको प्रहरीले फेला पारी चालक महर्जनलाई पक्राउ गरेको हो ।

महर्जनलाई बरामद मोटरसाइकल र घरेलु मदिरा सहित आवश्यक कानूनी कार्वाहीको लागि आन्तरिक राजश्व कार्यालय कलंकी पठाइएको महानगरीय प्रहरी वृत्त थानकोटले जनाएको छ ।

आगलागीबाट डेढ करोड भन्दाबढीको धनमाल जलेर नष्ट

काठमाडौं, २२ चैत / कपिलवस्तु, बिजयनगर गाउँपालिका-१ गुगौलीस्थित गाउँमा शुक्रबार दिउँसो आगलागी हुँदा फुसले छाएका १८ वटा घर र ७ वटा पक्की घर समेत जलेर करिब १ करोड रुपैयाँ बराबरको धनमाल जलेर नष्ट भएको छ ।

यसैगरी कपिलवस्तु, शुद्धोधन गाउँपालिका-२ भुसुदी बस्ने राम बृक्ष धोबीको गोठमा शुक्रबार राति आगलागी हुँदा निजको गोठ तथा छिमेकी श्रीराम धोबीको घरमा समेत आगलागी हुँदा करिब ४ लाख रुपैयाँ बराबरको धनमाल नष्ट भएको छ ।

सर्लाही, हरिवन नगरपालिका-२ स्कुल टोल बस्ने रामबाबु महतोको घरमा विद्युत सर्ट भई शुक्रबार साँझ आगलागी भई नजिकै रहेका अन्य ३ जनाको घर समेत पूर्णरुपमा जलेर करिब ४२ लाख रुपैयाँ बराबरको धनमाल नष्ट भएको छ ।

धनुषा, लक्ष्मीनिया गाउँपालिका-५ भंगाहा बस्ने ६० वर्षीय रामलोचन यादवको गोठमा शनिबार बिहान आगलागी हुँदा करिब ५ लाख रुपैयाँ बराबरको धनमाल नष्ट भएको छ ।

भोजपुर, अरुण गाउँपालिका-३ बिजयबास बस्नेक ३८ वर्षीय जगत बहादुर श्रेष्ठको घरमा विद्युत सर्ट भई शुक्रबार दिउँसो आगलागी हुँदा करिब ५ लाख ४७ हजार रुपैयाँ बराबरको धनमाल नष्ट भएको छ ।

सप्तरी, डाक्नेश्वरी नगरपालिका-५ बस्ने मो। ईसराफिलको घरमा करेण्ट सर्ट भई शुक्रबार दिउँसो आगलागी भई छिमेकी मो। हबिब मियाको गोठ समेत जलेर करिब ३ लाख ५० हजार रुपैयाँ बराबरको धनमाल नष्ट भएको छ ।

यसैगरी सप्तरी, अग्निसाईर कृष्णासवरण गाउँपालिका-४ बनौली बस्ने जय नारायण यादवको गोठमा शुक्रबार दिउँसो आगलागी भई छिमेकी जोगिन्द्र यादव लगायत ५ जनाको गोठमा समेत आगलागी हुँदा करिब १ लाख ८२ हजार रुपैयाँ बराबरको धनमाल नष्ट भएको छ ।

स्थानीय बासिन्दा तथा दमकलको सहयोगमा आगलागी नियन्त्रणमा लिइएको हो ।

मोटरसाइकल दुर्घटनामा परी हरिजनको मृत्यु

नवलपरासी (बर्दघाट सुस्ता पश्चिम), २२ चैत / सरावल गाउँपालिका-७ गणेशपुरस्थित सडकमा भारतीय नम्बर प्लेटको मोटरसाइकल दसर्घटना हुँदा एक जनाको मृत्यु भएको छ ।

युपि ५७ क्यू ५६४३ भारतीय नम्बर प्लेटको मोटरसाइकल अनियन्त्रित भई शनिबार बिहान दुर्घटना हुँदा मोटरसाइकल चालक सोही ठाउँ बस्ने २२ वर्षीय अजित हरिजनको मृत्यु भएको हो ।

दुर्घटनामा गम्भीर घाइते भएका उनको जिल्ला अस्पताल परासीमा उपचारको क्रममा मृत्यु भएको प्रहरीले जानकारी दिएको छ ।

 

मेगा बैंकद्वारा मुख्यमन्त्रीलाई ५ लाख हस्तान्तरण

हेटौंडा,२१ चैत /  बागमती प्रदेश सरकारले स्थापना गरेको कोरोना भाइरस सङ्क्रमण रोकथाम, नियन्त्रण तथा उपचार कोषमा मेघा बैंकले ५ लाख रुपैयाँ सहयोग उपलब्ध गराएको छ ।

बैंकका हेटौंडा शाखा प्रमुख निरन्जन देबकोटाले मुख्यमन्त्री डोरमणि पौडेललाई ५ लाख रकमको चेक हस्तान्तरण गर्नुभएको हो ।

बिश्वलाई नै आक्रान्त पारेको कोरोना भाईरस नियन्त्रणमा सहयोग गर्न रकम हस्तान्तरण गरिएको प्रमुख देबकोटाले बताउनुभयो ।

बैंकले सामाजिक उत्तरदायित्व अन्तर्गत रकम हस्तान्तरण गरेको हो । हस्तान्तरण गरिएको रकमले प्रदेश स्तरमा थोरै भएपनि सहयोग पुग्ने अपेक्षा बैंकले गरेको छ ।

हेटौंडाको क्याम्पाडाँडा : एकपछि अर्को ‘हत्या काण्ड’

मकवानपुर, १८ चैत । हेटौंडा उपमहानगरपालिका वडा नं. ५ क्याम्पाडाँडामा माघ ४ गते तेस्रो लिङ्गी अजिता भुजेलको हत्या गरी शव फालिएको अवस्थामा फेला परेको थियो ।

त्यसको ठिक २ महिना १३ दिनपछि आज पुनः क्याम्पाडाँडामै सनाखत हुन बाँकी एक पुरुषको शव फेला परेको छ । प्रहरीले शव फेला पार्दा कुहिएर गन्हाउने भइसकेको अवस्थामा छ ।

शव कसेको हो, हत्या वा आत्महत्या के हो भन्ने बारे प्रहरीले विस्तृत अनुसन्धान गरिरहेको
छ ।

प्रहरीले अहिले क्याम्पाडाँडामा घटनास्थल प्रकृति मुचुल्का, लास जाँच मुचुल्का तयार गर्ने लगायतका प्राविधिक काम गरिरहेको छ ।

हेटौंडाको क्याम्पाडाँडामा शव कुहिएको अवस्थामा फेला

मकवानपुर, १८ चैत । हेटौंडा ५ क्याम्पाडाँडा  पुलमुनी अन्दाजी ४५/५० वर्षको उमेरको एक पुरुषको शव फेला परेको छ । शव कुहिएर गह्हाउन थालिसकेको प्रहरीले जनाएको छ ।

शव गन्हाउन थालिसकेको कारण के भएर घटना हुन गएको हो यकिन भन्न सकिने अवस्था छैन ।

भर्खरै प्रहरी घटनास्थल पुगेको छ । घटनाको विस्तृत विवरण आउन बाँकी छ ।

यसअघि पनि क्याम्पाडाँडामा तेस्रो लिङ्गी अजिता भुजेलको हत्या गरी शव फालेको अवस्थामा भेटिएको थियो ।

 

गाँजा तस्करीमा नाम पोलिएपछि मेयर र नेकपा नगर अध्यक्षलाई पक्राउ पूर्जी

रौतहट, १८ चैत । रौतहटको ईशनाथ नगरपालिकाका मेयर सन्तोष मेहतालाई पक्राउ गर्न प्रहरीले पूर्जी जारी गरेको छ । जिल्ला प्रहरी कार्यालय मकवानपुरले मेहतालाई पक्राउ गर्ने पूर्जी रौतहट प्रहरीलाई पठाएको हो ।

मेयर मेहताका भाई नेकपा नगर अध्यक्ष मोहन मेहताको नाममा पनि पक्राउ पूर्जी जारी भएको छ ।

गाँजा तस्करीमा संलग्न भएकोमा उहाँहरुमाथि अनुसन्धान गर्न पक्राउ पूर्जी जारी भएको हो । माघ ११ गते हेटौंडा १९ नेवारपानी प्रहरीले एम्बुलेन्सलाई चेकजाँच गर्दा ३० किलो गाँजा र ९१ हजारभन्दा बढी भारतीय रुपैयाँ बरामद गरेको थियो ।

बा २ झ १७४९ नम्बरको सरकारी एम्बुलेन्समा तीनवटा झोलाभित्र छवटा पोकामा गाँजा राखी मनहरीबाट हेटौँडातर्फ ल्याउँदै गरेको अवस्थामा प्रहरीले पक्राउ गरेको थियो।

एम्बुलेन्सका चालकसहित थप २ जनालाई प्रहरीले पक्राउ गरेको थियो भने उहाँहरुकै बयानका आधारमा अदालतले मेयर मेहता र उहाँका भाइलाई पक्राउ गर्न आदेश जारी भएको हो ।