जब मुख्यमन्त्री पौडेल सहयोग लिन उद्योग संघ मकवानपुरको भवनमा पुग्नुभयो !

मकवानपुर २२ चैत । बागमती प्रदेश सरकारका मुख्यमन्त्री डोरमणि पौडेलले उद्योग संघ मकवानपुरको भवनमा पुगेर सहयोग ग्रहण गर्नुभएको छ ।

उद्योग परीसङ्घ बागमती प्रदेशले केही खाध्यान्न सहयोग गर्ने भएपछि ग्रहणका लागि मुख्यमन्त्री पौडेल आफैँ त्यहाँ पुग्नुभएको हो ।

उद्योग परीसंघ बागमती प्रदेशले दिने भनेको १ हजार प्याकेट खाद्यान्न ग्रहण गर्न मुख्यमन्त्री पौडेल आफैँ पुग्नुभएको मुख्यमन्त्री तथा मन्त्रिपरिषद्को कार्यालय हेटौँडाले जानकारी दिएको छ ।

कार्यालयले दिएको जानकारी अनुसार परीसंघका संयोजक ऋषिराम घिमिरे र उद्योग संघ मकवानपुरका अध्यक्ष लेखराज पोखरेलले मुख्यमन्त्री पौडेललाई उक्त खाध्यान्न हस्तान्तरण गर्नुभएको हो ।

उहाँले लकडाउनको समयमा आर्थिक अवस्थाको कारण गुजारा चलाउन नसक्नेहरुलाई उक्त खाध्यान्न ठूलो राहत हुने बताउनुभयो ।

मुख्यमन्त्री पौडेलले जिल्ला समन्वय समिति मकवानपुरका संयोजक रघुनाथ खुलाललाई प्रदेशमा उक्त खाध्यान्न वितरण गर्न हस्तान्तरण गर्नुभएको समेत जनाइएको छ ।

खुलालले उक्त खाद्यान्न जिल्ला जिल्लामा पुगेर अवस्था हेरी वितरण गर्ने बताउनुभयो ।
मकवानपुरका पानी व्यवसायीहरुले मुख्यमन्त्री पौडेललाई हिजोमात्रै १ सय कार्टून प्रशोधित पानी पनि उपलब्ध गराउनुभएको थियो ।

मकवानपुर प्रहरीद्वारा लकडाउन अवज्ञा गर्ने ७४ जना पक्राउ, ३ सय १२ वटा सवारी नियन्त्रणमा

मकवानपुर २२ चैत । लकडाउनको अवधिमा अत्यावश्यक काम नपरी सडक डुल्ने र सवारी चलाउनेहरुलाई मकवानपुर प्रहरीले नियन्त्रणमा लिइ अवस्था हेरेर कारबाही गरेको जानकारी दिएको छ ।

जिल्ला प्रहरी कार्यालय मकवानपुरका प्रवक्ता प्रहरी निरिक्षक सुजन पाठकले दिनुभएको जानकारी अनुसार लकडाउनको अवज्ञा गर्ने ७४ जनालाई प्रहरीले नियन्त्रणमा लिएर सम्झाइ बुझाइ छाडेको छ ।

लकडाउनको ११ औँ दिनसम्म आइपुग्दा ३ सय १२ वटा सवारी साधनसमेत प्रहरीले नियन्त्रणमा लिएको उहाँले जानकारी दिनुभयो ।

नियन्त्रणमा लिइएका सवारीमध्ये अधिकाँश मोटरसाइकल रहेको छ भने केही ४ पाङ्ग्रे सवारी र अटो मयुरीसमेत रहेको उहाँले जानकारी दिनुभयो ।

लकडाउन प्रभावकारी बनाउन मकवानपुर प्रहरी सक्रिय रहेको बताउँदै उहाँले लकडाउनको पालना गर्न मकवानपुरबासीहरुलाई अनुरोध समेत गर्नुभएको छ ।

कोरोना प्रभाव –अष्ट्रेलिया सरकारद्वारा अस्थायी भिसा भएकाहरुलाई आफ्नै देश फर्कन आग्रह

काठमाडौँ २२ चैत । अष्ट्रेलिया सरकारले अस्थायी भिसा भएका विदेशीहरुलाई घर फर्कन सुझाएको छ । नेपाली विद्यार्थीहरुको अध्ययन र कमाइका हिसाबले राम्रो गन्तव्य बनको अष्ट्रेलियामा ६ महिनासम्म आफ्नो खर्च धान्न नसक्नेहरुलाई घर फर्कन सुझाइएको छ ।

अष्ट्रेलिया सरकारले कोरोना भाइरस को महामारीका कारण आर्थिक मन्दी र बेरोजगारी बढेको भन्दै सरकारले विद्यार्थी, दक्ष कामदार र पर्यटकलाई घर फर्कन आग्रह गरेको हो ।

सरकारले अबको छ महिनासम्म आफ्नो खर्च धान्न नसक्ने अस्थायी भिसा भएका मानिसहरुलाई आफ्नो मुलुक फर्कन आग्रह गरेको हो ।

अष्ट्रेलिया सरकारले शनिबार गरेको घोषणामा पीआर पाउने मानिसहरु भने समावेश गरिएको छैन ।

यस्तै करिब एक लाख १८ हजार सहयोगीको रुपमा गएका वा अन्य किसिमको भिसा भएका मानिस हुनुहुन्छ ।

अष्ट्रेलियामा पाँच लाख ६५ हजार अन्तर्राष्ट्रिय विद्यार्थी हुनुहुन्छ ।

मकवानपुरको थाहा नगरमा २५ वेडको क्वारेन्टाइन तयारी अवस्थामा

मकवानपुर २२ चैत । मकवानपुरको उत्तरी क्षेत्रस्थित थाहा नगरपालिकाले कोरोना भाइरसको संक्रमणको जोखिम्लाई मध्येनजर गर्दै सतर्कता अपनाएको छ ।

नगरपालिकाले वडा नम्वर ६ मा क्वारेन्टाइन स्थापना गरी संचालनको लागि तयारी अवस्थामा राखेको जानकारी दिएको छ ।
उक्त क्वारेन्टाइनमा १ जना चिकित्सक, २ जना नर्श, ३ जना अनमीसहित जम्मा ६ जना जनशक्ति तयारी अवस्थामा रहेकोसमेत नगरपालिकाले जानकारी दिएको छ ।

उक्त क्वारेन्टाइन कक्षमा हाइकेयर रुम ५ वटा, क्वारेन्टाइन रुम २० वटा, तयारी अवस्थामा रहेको नगरपालिकाका मेयर लवसेर विष्टले जानकारी दिनुभयो । उहाँको अनुसार उक्त क्वारेन्टाइनमा हालसम्म विरामी भने राखिएको छैन ।

नगरभित्र विदेशबाट आउनुभएकाहरुको विवरण संकलन गरी उहाँहरुको स्वास्थ्य परीक्षण गर्ने कार्य पनि भइरहेको उहाँले जानकारी दिनुभयो ।

नगरभित्रका जेष्ठ नागरीकहरुको पनि स्वास्थ्य परीक्षण भइरहेको उहाँको भनाई छ ।

लकडाउनमा अनावश्यक बाहिर हिड्ने १६ जना प्रहरीको फन्दामा

बारा २२ चैत । लकडाउनको अवधिमा जिल्ला प्रशासन कार्यालय बाराले जारी गरेको निषेधाज्ञा पालना नगर्ने १६ जनालाई नियन्त्रणमा लिइएको जिल्ला प्रहरी कार्यालय बाराले तु खबरलाई जानकारी दिएको छ ।

प्रहरीले दिएको जानकारी अनुसार उहाँहरुलाई संक्रामक रोग ऐन २०२० अनुसार कारवाहीको लागि जिल्ला प्रशासन कार्यालय पठाइएकोमा प्रशासन कार्यालयले जरिवाना गरी आज छोडेको हो ।

प्रशासन कार्यालयले अवज्ञा तथा उल्लघन गर्ने ३१ वटा मोटरसाइकल र एउटा ट्याक्टर चालकलाई समेत जरीवाना तिराएको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिनुभयो ।

कोरोनाबारे सरकारले सूचना लुकायो – विप्लव

काठमाडौँ २२ चैत । नेत्र विक्रम चन्द विप्लव नेतृत्वको नेकपाले कारोना बारे सरकारले सूचना लुकाएको आरोप लगाएको छ ।

सरकारले कारोना संक्रमणका कारण मृत्यु भएकाहरुको सूचना लुकाइरहेको आरोप प्रतिबन्धित नेकपाका महासचिव विप्लवले लगाउनुभएको हो ।

आज शनिबार एक विज्ञप्ति जारी गर्दै विप्लवले कोरोनाका आशंकामा निजी क्षेत्रबाट चलेका अस्पतालले बिरामीको उपचार गर्न अस्वीकार गरेको र केहीको ज्यान समेत गएकाले सरकारले सूचना प्रणाली विश्वसनीय नदेखिएको बताउनुभएको हो ।

विज्ञप्तीमा सरकारले आवश्यक स्वास्थ्य उपकरण आयात र उत्पादनमा समयमै पहल नगरेको साथै आवश्यक औजार तथा उपकरण खरिदमा पनि भ्रष्टाचार गर्न खोजेको उल्लेख छ ।

विदेशमा रहेका नागरिकलाई हवाइजहाजबाट स्वदेश ल्याउँदा समेत टिकटबाट आउने रकमा कमिसनखोरी गरिएको विप्लवको दावी छ ।

विरामी बोक्न छाडेर यात्रु ओसार्ने ३ वटा एम्बुलेन्सलाई प्रहरीले नियन्त्रणमा लियो

काठमाडौँ २२ चैत । सरकारले कोरोना भाइरस नफैलियोस् भन्नका लागि देशैभर लकडाउन घोषणा गरेको छ । लकडाउनमा अत्यावश्यक सवारी साधन चलाउन सकिन्छ तर अत्यावश्यक सवारी चलाउने पाइिने भएपनि सवारीको दुरुपयोग भने गर्न मिल्दैन ।

बढी पैसा कमाउने उदेश्यले बिरामी छाडेर यात्रु बोक्ने ३ वटा एम्बुलेन्सलाई प्रहरीले आज नियन्त्रणमा लिएको छ । पूर्वपश्चिम महेन्द्र राजमार्गको चन्द्रपुरमा यात्रुु बोकेको अवस्थामा ती एम्बुृलेन्सलाई प्रहरीले नियन्त्रणमा लिएको हो ।

नियन्त्रणमा रहेकामध्ये २ वटा नीजि र एउटा रेडक्रस सोसाइटी सर्लाही उपशाखा हिरापुरको रहेको बताइएको छ ।

काठमाडौंबाट यात्रुुसहित हरिऔन आउँदै गरेको ज १ च १३४४, सर्लाहीको बरथहवाबाट यात्रु लिएर वीरगन्ज हिँडेको ना १ च ९१९६, सर्लाहीको नवलपुरबाट वीरगञ्ज जाँदै गरेको ना २ च ९९७७ नम्बरको एम्बुलेन्स र चालक समेतलाई नियन्त्रणमा लिएको हो ।

अन्य दिनको तूलनामा राजमार्गमा एम्बुलेन्स बढी चलेको देखेपछि प्रहरीले चेकजाँचलाई कडा पारेको थियो ।

कोरोना संक्रमणबाट कोरियामा एक जना चिकित्सकको मृत्यु

कोरोना भाइरसबाट सङ्क्रमित एक कोरियन चिकित्सकको शुक्रबार मृत्यु भएको छ । उहाँ कोरियाको थेगुस्थित एक अस्पतालमा कार्यरत हुनुहुन्थ्यो । आफूमा कोरोना सङ्क्रमण भएको पाइएपछि उहाँ मार्च १९ देखि ख्याङ्बुक नेसनल युनिभर्सिटी अस्पताल थेगुमा उपचार गराइरहनुभएको थियो । उनलाई आफ्नो मेडिकलमा आएका सङ्क्रमितबाटै जाँच गर्ने क्रममा सङ्क्रमण भएको हुनसक्ने आशङ्का गरिएको छ ।

कोरियामा कोरनाका कारण शुक्रबारसम्म उनीसँगै मृत्यु हुनेको सङ्ख्या १७४ पुगेको कोरिया रोग नियन्त्रण केन्द्रले जनाएको छ भने हालसम्म सङ्क्रमितको सङ्ख्या १० हजार ६२ पुगेको छ ।
दक्षिण कोरियामा कोरोना भाइरस नियन्त्रणमा आइरहेको खबर सार्वजनिक भइरहेका बेला चिकित्सकको मृत्युले सिङ्गो मेडिकल क्षेत्रले शोक मनाइरहेको उनका सहकर्मीले जनाएका छन् ।

उनीहरूले भनेका छन्, ‘हामी हाम्रो सहकर्मीको उच्च सम्मान गर्दै कोरोनासँग डटेर लड्नेछौँ । कोरोना सङ्क्रमित प्रत्येक बिरामी उपचारपश्चात् सकुसल अस्पतालको ढोकाबाट मुस्कुराउँदै बिदा नभएसम्म हामी निरन्तर खट्ने छौँ ।’ कोरियामा कोरोना सङ्क्रमणका कारण चिकित्सकको मृत्यु भएको यो पहिलो घटना हो ।
रासस

गैर आवासीय नेपाली संघ दक्षिण कोरियाले नेपाल सरकारलाई स्वास्थ्य सामग्री सहयोग गर्ने

बुद्धिप्रसाद नेपाल

सौल दक्षिण कोरिया २२ चैत । विश्वभर फैलिरहेको कोरोना भाइरसले दक्षिण कोरियामा २ महिनासम्म जनजीवन अस्तव्यस्त बनाएको भएपनि अहिले भने कोरोनाको संक्रमण न्यून हुँदै गएको गैर आवासीय नेपाली संघ (एनआरएनए)ले दक्षिण कोरियाले जनाएको छ ।

कोरिया सरकारले कोरोनालाई लगभग नियन्त्रण लिइसकेको अवस्थामा कोरियामा रहेका नेपालीहरुलाई सचेत हुनुपर्ने तर त्रसित नहुन आग्रह समेत गरिएको छ ।

संघले विज्ञप्ती जारी गर्दै हालसम्म कोरियामा रहनुभएका १ जना नेपालीमा पनि कोरोना भाइरसको संक्रमण नभएको जानकारी दिएको छ ।

नेपालमा भने विस्तारै कोरोनाको संक्रमण बढ्दै गएको र हालसम्म ६ जनामा कोरोनाको संक्रमण पुष्टी भइसकेको अवस्थाप्रति कोरियामा विभिन्न पेशा र व्यवसाय गर्दै आइरहनुभएका नेपालीहरुले चासो चिन्ता व्यक्त गर्नुभएको छ । उहाँहरुले नेपालमा आवश्यक स्वास्थ्य सामग्री पठाउन आर्थिक सहयोग समेत गर्दै आइरहनुभएको छ ।

संघले नेपाल सरकारलाई सहयोग गर्ने भनेर एक व्यक्ति एक किटको नारा अघि सारेर कोरियामा रहनुभएका आम नेपालीहरुलाई सहयोगको अपिल गरेको र नेपालीहरुबाट पनि सहयोग भएको जनाएको छ ।

सुरुवातमा संघले २ हजार किट मात्र नेपाल पठाउने भनेर नेपाली ४० लाखको अपेक्षा गरेर सहयोगको लागि आह्वान गरेको भएपनि नेपालीको मातृभुमि प्रतिको मायाले सहयोग रकम सोचेभन्दा धेरै हुन गएको जनाएको छ ।

अपेक्षाभन्दा धेरै रकम संकलन भएपछि संघले सहयोगको दायरा बनाएर किट मात्र नभई स्वास्थ्य सम्बन्धी आवश्यक थप सामाग्री नेपाल सकारलाई सहयोग गर्ने भन्दै अर्को विज्ञप्ती जारी गरेको छ ।

सुरुवातमा भनेको समयमा स्वास्थ्य सामग्री नेपालमा पठाउन सकिएको भए अहिले नेपाल सकारलाई सामान हस्तान्तरण भइसक्ने तर उडान बन्द भएकोले किट पठाउन ढिलाइ भएको संघले जनाएको छ ।

संघले आगामी अप्रिल १० मा नेपाल सकारलाई सामान हस्तान्तरण गर्ने उदेश्य लिएको समेत जानकारी दिएको छ ।

विगतमा अपारदर्शीताको विषयमा धेरै प्रश्न उठ्ने गरेकोले अहिले सबै सामानहरुको पूर्ण विवरण पनि उपलब्ध गराउन जनाएको छ ।

बलात्कारको आरोपमा २ जना युवक पक्राउ

काठमाडौँ २२ चैत ।  एक युवतीलाई बलात्कार गरेको आरोपमा प्रहरीले भोजपुरका एक युवकलाई पक्राउ गरेको छ ।

बेलकोटगढी नगरपालिका ७ मा सहचालकका रुपमा काम गर्दै आएका भोजपुर पौवादुम्बा –५ का २१ वर्षीय सत्यकुमार राईलाई पक्राउ गरी अनुसन्धान थालिएको जिल्ला प्रहरी कार्यालयका प्रवक्ता राजेश थापाले जानकारी दिनुभयो ।

आरोपित राईले बेलकोटगढी, दुईपिपलकी युवतीलाई ललाईफकाई गत सोमबार राति त्रिशूली नदीको किनारमा लगी बलात्कार गरेको भन्दै पीडित पक्षले बिहीबार उजुरी दिएपछि पक्राउ गरिएको थियो ।

घोडाघोडी– कैलालीको घोडाघोडी नगरपालिकामा बलात्कारको आरोपमा एक जना पक्राउ पर्नुभएको छ ।

घोडाघोडी–९ का २४ वर्षीय भुवन रावललाई सोही स्थानकी युवतीलाई बलात्कार गरेको आरोपमा पक्राउ गरिएको इलाका प्रहरी कार्यालय सुखडले जनाएको छ ।

बिहीबार राति करीब १ बजेतिर घरमा सुतिरहेका अवस्थामा घरको कोठामै आएर आफूलाई जबर्जस्ती करणी गरेको युवतीले जाहेरी दिएपछि अनुसन्धानका लागि रावललाई पक्राउ गरिएको इलाका प्रहरी कार्यालय सुखडका प्रमुख हरिशरण भट्टले जानकारी दिनुभयो ।

रासस