नेपालमा कोरोना संक्रमणबाट थप एक जनाको मृत्यु भएको स्वास्थ्य मन्त्रालयद्वारा पुष्टि

काठमाडौं । नेपालमा थप एक जना कोरोना संक्रमितको मृत्यु भएको छ । संक्रमणका कारण रौतहटका पर्रोहा नगरपालिका वडा नं ७ का ३६ वर्षीय एक पुरुषको मृत्यु भएको स्वास्थ्य तथा जनसंख्या मन्त्रालयले बुधवार पत्रकार सम्मेलन मार्फत पुष्टि गरेको हो ।

मृतक पुरुष कोरोना संक्रमणका कारण मृत्यु भएका दाजुको अन्तिम संस्कारका लागि भारत गएको र असार १४ गते नेपाल फकिएर स्थानीय क्वारेन्टाइनमा बस्दै आएका थिए ।

रुघाखोकी, ज्वरो र श्वासप्रश्वाससम्बन्धी समस्या देखिएपछि असार २९ गते नारायणी अस्पताल वीरगंजमा भर्ना भएका उनको उपचारको क्रममा बुधवार दिउँसो मृत्यु भएको मन्त्रालयका प्रवक्ता डा. जागेश्वर गौतमले जानकारी दिए ।

मृतक पुरुषको अस्पताल भर्ना भएकै दिन कोरोना परीक्षणको लागि स्वाब संकलन गरेपनि बुधबार मात्रै संक्रमण पुष्टि भएको हो । उनको हेटौंडास्थित किटजन्य रोग तथा अनुसन्धान तालिम केन्द्रमा गरिएको परीक्षणमा पीसीआर रिपोर्ट पोजेटिभ आएको प्रवक्ता गौतमले बताए ।

योसँगै नेपालमा कोरोना संक्रमणबाट मृत्यु हुनेको संख्या ३९ जना पुगेको छ ।

थप ११६ जनामा कोरोना संक्रमण पुष्टि, संक्रमितको संख्या १७ हजार १ सय ७७ जना पुग्यो

काठमाडौं । नेपालमा पछिल्लो २४ घण्टामा ११६ जना कोरोना संक्रमित व्यक्ति थपिएका छन् । स्वास्थ्य तथा जनसंख्या मन्त्रालयका अनुसार, बितको २४ घण्टामा देशभरको २५ वटा प्रयोगशालामा गरिएको परीक्षणमा थप ११६ जनामा कोरोना संक्रमण पुष्टि भएका हुन् ।

योसँगै नेपालमा कोरोना संक्रमितको कूल संख्या १७ हजार १७७ जना पुगेको छ ।

मन्त्रालयका प्रवक्ता डा. जागेश्वर गौतमका अनुसार, बुधबार थप ६९७ जना कोरोना संक्रमण मुक्त भएसँगै कोरोना संक्रमितको कुल संख्या ११ हजार २५ जना संक्रमण मुक्त भएका छन् ।

कोरोना संक्रमणबाट हालसम्म ३९ जनाको मृत्यु भएको छ । बुधबार थप एक जना कोरोना संक्रमितको मृत्यु भएसँगै मृतकको संख्या ३९ पुगेको प्रवक्ता गौतमले बताए ।

सुस्मिता हत्या प्रकरणः प्रकाश थापालाई भीमफेदी र अन्यलाई भरतपुर कारागार पठाउने

मकवानपुर । मकवानपुर जिल्ला अदालतले हेटौंडा उपमहानगरपालिका वडा नम्बर ४ सूर्यचोककी सुस्मिता केसी थापाको हत्यारामध्ये एक जनालाई भीमफेदी कारागार र तीन जनालाई चितवनको भरतपुर कारागार पठाउने जनाएको छ ।

अदालतका अनुसार, सुस्मिताको ससुरा प्रकाश थापालाई भीमफेदी कारागार र सासु तुलसा कुमारी थापा, नन्दहरु सीता थापा र दुर्गा थापा कार्कीलाई भरतपुर कारागार पठाउने भएको हो ।

बुधवार जिल्ला न्यायधीश सीता शर्मा अधिकारीको एकल इजालशले सुस्मिता केसी थापाको आफ्नै सुसरा प्रकाश, सासु तुलसा, नन्द सीता थापा र दुर्गा थापा कार्कीलाई पूर्पक्षका लागि जेल चलान गर्ने आदेश दिएसँगै उनीहरुलाई कारागार पठाउने भएको हो ।

उक्त अदालतले सुस्मिताको नन्द दुर्गा थापा कार्कीको श्रीमान अरुण कार्कीलाई पक्राउ गर्न पक्राउ पुँजी जारी गर्ने भएको छ । यस घटनामा अरुण पनि संलग्न रहेको र उनी हाल फरार रहेका कारण मकवानपुर जिल्ला अदालतले पक्राउ पुँजी जारी गर्ने भएको जिल्ला अदालत मकवानपुरका श्रेस्तेदार तीर्थराज भट्टराईले जानकारी दिए ।

सुदूरपश्चिममा थप १९ जनामा कोरोना संक्रमण पुष्टि

डडेल्धुरा । सुदूरपश्चिम प्रदेशमा थप १९ जनामा कोरोना भाइरस (कोभिड–१९) संक्रमण पुष्टि भएको छ । बिहीबार धनगढी प्रयोगशालामा गरिएको परीक्षणमा थप १९ जनामा कोरोना पुष्टि भएको हो ।

नयाँ कोरोना संक्रमितहरुमा १२ जना पुरुष र ७ महिला रहेका छन् ।

सेती प्रादेशिक अस्पतालका सूचना अधिकारी दिलीपकुमार श्रेष्ठका अनुसार, कञ्चनपुरको बेदकोट नगरपालिकाका–१ महिला र १० पुरुष गरी ११ जना, कैलालीको टीकापुर नगरपालिका–१ का ४ महिला, अछामको चौरपाटी गाउँपालिका–५ का २ महिला र अछामको साँफेवगर नगरपालिका–११ का २ पुरुषमा कोरोना पुष्टि भएको छ ।

योसँगै सुदूरपश्चिममा संक्रमितको संख्या ३ हजार ९ सय ७५ पुगेको छ । संक्रमितमध्ये हालसम्म १ हजार ५ सय ८५ जना संक्रमण मुक्त र ८ जनाको निधन भएको छ ।

भोलि साउन १ गते सार्वजनिक बिदा हुने

सुर्खेत । कर्णाली प्रदेश सरकारले साउने १ सार्वजनिक बिदा दिने निर्णय गरेको छ । प्रदेश सरकारले भोलि साउन १ गते साउन सङ्क्रान्तिको अवसरमा सार्वजनिक बिदा दिने निर्णय गरेको हो ।

आन्तरिक मामिला तथा कानून मन्त्रालयले प्रदेश मन्त्रिपरिषद्को निर्णयका आधारमा भोलि प्रदेशका १० वटै जिल्लामा साउने सङ्क्रान्ति तथा देउडा पर्वको अवसरमा सार्वजनिक बिदा हुने जनाएको छ ।

प्रदेश मन्त्रिपरिषद्को बैठकले साउन १ गतेसहित सात दिन सार्वजनिक बिदा दिने निर्णय गरेको थियो । जसमा साउने संक्रान्ति पर्व पनि परेको जनाएको छ ।

सुस्मिताको हत्यामा संलग्न चारै जनालाई पुर्पक्षको लागि जेल चलान गर्न आदेश

मकवानपुर । मकवानपुर जिल्ला अदालतले हेटौंडा उपमहानगरपालिका वडा नम्बर ४ सूर्यचोककी सुस्मिता केसी थापाको हत्यारालाई पूर्पक्षको लागि जेल चलान गर्ने आदेश दिएको छ ।

बुधवार अदालतकी जिल्ला न्यायधीश सीता शर्मा अधिकारीको एकल इजालशले सुस्मिता केसी थापाको आफ्नै सुसरा प्रकाश थापा, सासु तुलसा कुमारी थापा, नन्द सीता थापा र दुर्गा थापा कार्कीलाई पूर्पक्षका लागि जेल चलान गर्ने आदेश दिएको हो ।

अभियुक्त चार जनामध्ये एक जना अभियुक्तलाई भीमफेदी कारागार र तीन जनालाई चितवनको भरतपुर कारागार पठाउने भएको जिल्ला अदालत मकवानपुरले जनाएको छ ।

अदालतका अनुसार, सुस्मिताको ससुरा प्रकाश थापालाई भीमफेदी कारागार र अन्यलाई भरतपुर कारागार पठाउने भएको हो ।

सुस्मिताको ससुरा प्रकाश थापाले दुर्घटनामा परी मृत्यु भएका आफ्नो छोरा रुपेन्द्र थापाको ६ महिनाको श्राद्ध संस्कार गर्नको लागि बुहारी (सुस्मिता) लाई माइतीबाट बोलाई परिवारकै मिलोमत्तोमा गत असार १ गते राति भान्साकोठामा सुस्मिताको सिलौटाको लोहोराले टाउकोमा प्रहार गरी हत्या गरेको जिल्ला अदालत मकवानपुरमा दिएको बयानमा स्वीकार गरेको श्रेस्तेदार तीर्थराज भट्टराईले जानकारी दिए ।

उनका अुसार, अदालतको बयानमा उनीहरुले बयानमा बुहारी सुस्मितालाई मृतक छोरोका तर्फबाट आउने बीमा बापतको रकम पाउने भएको र उक्त रकम सुस्मिताले नभई आफुहरुले खर्च गर्ने उद्देश्यले परिवारकै मिलोमत्तोमा बुहारीको हत्या गरेको स्वीकार गरेका थिए ।

उक्त अदालतले सुस्मिताको नन्द दुर्गा थापा कार्कीको श्रीमान अरुण कार्कीलाई पक्राउ गर्न पक्राउ पुँजी जारी गरेको छ । यस घटनामा अरुण पनि संलग्न रहेको र उनी हाल फरार रहेका कारण मकवानपुर जिल्ला अदालतले पक्राउ पुँजी जारी गरेको श्रेस्तेदार भट्टराईले जानकारी दिए ।

विद्युत प्राधिकरण हेटौंडाको आय काउण्टर ५ दिनका लागि बन्द हुने

मकवानपुर । नेपाल विद्युत प्राधिकरण हेटौँडा वितरण केन्द्रको आय काउण्टर आजदेखि ५ दिनसम्मका लागि बन्द हुने भएको छ ।

प्राधिकरण हेटौंडाले सूचना जारी गर्दै आजदेखि साउन ४ गतेसम्मका लागि बन्द हुने जानकारी गराइएको हो ।

सूचनामा साउन महिनादेखि लागू हुने गरी प्राधिकरणले निर्धारण गरेको नयाँ विद्युत महशुल देशभर एकसाथ सफ्टवेयरमा अपटेड गर्नुपरेका कारण बन्द गरिएको केन्द्रले जनाएको छ ।

नेपालभरका विद्युत प्राधिकरणका काउण्टर बन्द हुने भएको छ ।

चितवनमा ८ जना नयाँ कोरोना संक्रमित फेला

चितवन । चितवनमा बुधवार ८ जना कोरोना संक्रमित थपिएका छन् । भरतपुरमा रहेको प्रयोगशालामा गरिएको परीक्षणमा चितवनको माडी नगरपालिकाका ८ जनामा संक्रमण पुष्टि भएको हो ।

संक्रमित व्यक्तिहरु माडी नगरपालिका वडा नम्बर १, ७ र ८ का १९ वर्षदेखि ३६ वर्ष उमेर समूहका पुरुषहरु संक्रमित भएका हुन् ।

माडी नगरपालिकाका अनुसार उनीहरु सबै जना क्वारेन्टिनमा बस्दै आइरहेका छन् ।

योसँगै चितवनमा कुल संक्रमितको संख्या १०८ पुगेको छ ।

कालीगण्डकीमा टिपर खस्यो, चालक बेपत्ता

म्याग्दी । म्याग्दीको अन्नपूर्ण गाउँपालिका–३, गुइठेभिरबाट कालीगण्डकीमा टिपर खस्दा चालक बेपत्ता भएका छन् ।

गिट्टी बोकेर गुइठेबाट घारतर्फ जाँदै गरेको बा २ ख ३४२५ नंको टिपर सडक भासिएर कालीगण्डकीमा खस्दा चालक बेपत्ता भएका हुन् ।

बेपत्ता हुनेमा टिपर चालक म्याग्दीको मङ्गला गाउँपालिका–५ का २६ वर्षीय ज्ञानबहादुर पुन रहेका छन् ।

साँघुरो सडकमा लोड भएको टिपरको टायरले टेकेको भाग भासिएपछि खसेको थियो । सो टिपर घारखोला जलविद्युत आयोजनाको निर्माण सामग्री ढुवानीमा प्रयोग भएको थियो ।

बेपत्ता उनको खोजीकार्य भइरहेको छ ।

सर्पको टोकाइबाट किशोरीको मृत्यु

धनगढी । बैतडीमा सर्पको टोकाइबाट एक किशोरीको मृत्यु भएको छ । सर्पको टोकाइबाट पञ्चेश्वर गाउँपालिका वडा नम्बर २ महाकालीकी १७ वर्षीया भागरथी चन्दको मृत्यु भएको हो ।

उनलाई मंगलबार राति घरमै सुतिरहेको अवस्थामा सर्पले टोकेको थियो ।

मृतक किशोरी देवथला माध्यमिक विद्यालयमा कक्षा ७ मा अध्ययनरत थिइन् ।