कांग्रेसको १५ औँ महाधिवेशनबारे २५ जना केन्द्रीय सदस्यहरूको ज्ञापनपत्र

काठमाडौँ । नेपाली कांग्रेसको संस्थापन पक्षमा रहेका २५ जना केन्द्रीय सदस्यहरूले पार्टीको १५ औँ महाधिवेशनका सन्दर्भमा ७ बुँदे मागसहित केन्द्रीय कार्यालय सानेपामा ज्ञापनपत्र बुझाएका छन्। ज्ञापनपत्र बुझाउने क्रममा केन्द्रीय सदस्य उदय शमशेर राणाले पार्टीको विधानअनुसार मंसिर १५ भित्र महाधिवेशन सुरु गरी तहगत रूपमा सम्पन्न गर्नुपर्ने माग उठाएका छन्। उनीहरूको भनाइ अनुसार यसले आउँदो २०८२ साल फागुन २१ गतेका प्रतिनिधिसभा निर्वाचनलाई परिणाममुखी बनाउन मद्दत पुर्‍याउनेछ।

ज्ञापनपत्रमा भदौ २३ र २४ गते भएका घटनाबारे निष्पक्ष छानबिन गरी आपराधिक गतिविधिमा संलग्न सबैलाई कानुनी दायरामा ल्याई कारबाही गर्न माग गरिएको छ। पार्टीभित्रको अव्यवस्था र विवादका कारण उत्पन्न घटनामा कुनै प्रकारको राजनीतिक संरक्षण नहुने वातावरण सिर्जना गर्नुपर्नेमा सदस्यहरूले जोड दिएका छन्।

महाधिवेशनको पहिलो आधार क्रियाशील सदस्यता नवीकरण र नयाँ सदस्यता वितरण भएकोले त्यसमा ढिलाइ नगरी समयसीमा तोकी कार्य सम्पन्न गर्नुपर्नेमा पनि ज्ञापनपत्रमा जोड छ। यसले अधिवेशन प्रक्रिया व्यवस्थित रूपमा अगाडि बढाउन सहयोग गर्नेछ।

युवाको प्रतिनिधित्व सुनिश्चित गर्न विधान संशोधन आवश्यक रहेको भन्दै १५ औँ महाधिवेशनमा युवा पुस्ताको उल्लेखनीय सहभागिता हुनु पर्ने माग राखिएको छ। साथै महिला, दलित, आदिवासी जनजाति, थारू, मधेसी, मुस्लिम, पिछडिएका क्षेत्र तथा वर्ग, र अपांगता भएका व्यक्तिहरूको अर्थपूर्ण सहभागिता सुनिश्चित गर्नुपर्नेमा पनि जोड दिइएको छ।

पार्टीको आन्तरिक निर्वाचन समितिलाई तत्काल पूर्णता दिनुपर्ने उल्लेख पनि ज्ञापनपत्रमा गरिएको छ, जसले महाधिवेशन प्रक्रियामा स्पष्टता र व्यवस्थितता ल्याउनेछ। साथै स्थानीय, प्रदेश र संघीय तहका निर्वाचनमा समानुपातिक समावेशिताको सिद्धान्तअनुसार युवा उम्मेदवारलाई प्राथमिकतामा राख्ने व्यवस्था गर्नुपर्ने माग पनि समेटिएको छ।

संविधान संशोधनको सन्दर्भमा पार्टीभित्र वडादेखि केन्द्रीय तहसम्म व्यापक संवाद सञ्चालन गरी स्पष्ट दृष्टिकोण र अवधारणा निर्माण गर्नुपर्ने विषयमा पनि ज्ञापनपत्रमा सुझाव दिइएको छ।

कांग्रेसमा महाधिवेशन नियमित गर्ने कि विशेष, चुनावअघि गर्ने कि पछि गर्ने भन्ने विवादका कारण एक महिनादेखि केन्द्रीय समिति बैठक अनिर्णीत रहेको छ। यही परिस्थितिमा देउवा समूहका २५ सदस्यले हस्ताक्षरसहित ज्ञापनपत्र बुझाउँदै आगामी भोलि दिउँसो २ बजे बस्ने केन्द्रीय समिति बैठकले महाधिवेशनको मिति र प्रकृतिबारे स्पष्ट निर्णय गर्नुपर्ने जोड दिएका छन्।